Müsavat Partiyası qapalı ümumrespublika müşavirəsi keçirib

Bu günlərdə Müsavat Partiyasının qərargahında ümumrespublika müşavirəsi keçirilib. 

Müşavirə 6 saata yaxın davam edib, partiyanın rayon, şəhər təşkilat sədrləri, müavinlər, partiya funksionerləri və partiya fəalları tədbirə qatılıblar. 

Müsavat Partiyası mərkəzi icra aparatının rəhbəri Arif Hacılı məruzə ilə çıxış edib. Divan üzvləri Qubad İbadoğlu, Tural Abbaslı və s. nitqləri dinlənilib. Müşavirədə partiya təşkilatlarının fəaliyyətinin gücləndirilməsi, qurultaya hazırlıq mərhələsində bütün təşkilatlarda konfrans və ümumi yığıncaqlarının keçirilməsinin başa çatdırılması vurğulanıb. Partiyaya yeni üzvlərin qəbuluna önəm verilib. Ölkənin bütün bölgələrində zona müşavirələrinin keçirilməsi tapşırıqları verilib. 

Təşkilat sədrləri, partiya fəalları çıxışlarında ictimaiyyətlə, vətəndaş cəmiyyəti institutları ilə əlaqələrin gücləndirilməsinə toxunublar. Eyni zamanda, ayrı-ayrı sosial təbəqə və qruplarla əlaqələrin genişləndirilməsi sahəsində işləri daha da gücləndirmək zərurəti qeyd olunub.

Rayon təşkilat sədrləri İctimai Palatanın (İP) möhkəmləndirilməsi, regional strukturların qurulması, partiya üzvlərinin sosial şəbəkələrdə fəallığının artırılması yönündə informasiyalar veriblər. Müşavirə mətbuata qapalı keçirilib. -05D-