Müstəntiq Hilal Məmmədovun suallarını cavablandırmaq məcburiyyətində qalacaq

Ağır Cinayətlərə dair İşlər üzrə Məhkəmədə bu gün “Tolışi sədo” qəzetinin baş redaktoru Hilal Məmmədovun işi üzrə proses davam etdirilib.

Hakim Azər Orucov bildirib ki, görülən tədbirlərə baxmayaraq, yenə hazırda RF-də olan şahid Ülfət Abbasovun məhkəməyə gəlməsini təmin etmək mümkün olmayıb. O, həmçinin müdafiə tərəfin Nizami rayon polis idarəsinin müstəntiqi Ceyhun Kərimovun şahid qismində cəlb edilməsi haqqında vəsatətini xatırladıb.

Öz növbəsində, dövlət ittihamçısı CPM-ə istinad edərək, şahid Abbasovun və ötən ilin dekabrında vəfat etmiş digər şahidin ifadələrini oxumağı təklif edib. O, müstəntiq Kərimovun prosesə çağırılması haqqında vəsatətin əleyhinə çıxıb.

Lakin vəkil Ramiz Məmmədov müstəntiqin çağırılmasında israr edib.

Onun sözlərinə görə, müdafiə tərəfin ona sualları var. Xüsusən, Məmmədovdan mobil telefonun müsadirə edilməsi sənədləşdirilmədiyi halda, telefonun hafizəsindəki məlumatdan necə istifadə olunduğunu soruşmaq istəyir. Telefon bir neçə gün ərzində istintaqın sərəncamında olub və ona Məmmədova qarşı məlumat daxil edilə bilərdi.

Bundan başqa, Məmmədovun üzərində axtarış haqqında protokollarda axtarışı şəxsən həyata keçirmiş polis əməkdaşı Qabil Hümbətovun imzası yoxdur.

Vəkil həmçinin şahidin məhkəməyə gətirilməsinin təmin edilməsində israr edib, belə ki, Avropa İnsan Hüquqları Konvensiyası və Azərbaycan qanunvericiliyi müttəhimin ona qarşı ifadə verənlərə sual vermək hüququ var.

H.Məmmədov özü narkotiklərlə bağlı ittihamın ləğvi haqqında vəsatətlə çıxış edib, belə ki, qərəzsiz şahid yoxdur.

“Bu maddə üzrə ittiham ləğv edilsə, başqa maddələr üzrə ittihamlar da avtomatik ləğv edilir. Belə ki, istintaq iddia edir ki, mən narkotik satışından əldə olunmuş puldan “dövlət əleyhinə fəaliyyətdə” istifadə etmişəm. Buna görə məhkəmədən cinayət işinə xitam verməyi və məni məhkəmə zalından sərbəst buraxmağı xahiş edirəm”, deyə H.Məmmədovu bildirib.

Öz növbəsində, vəkil R.Məmmədov heç olmasa qətimkan tədbirinin dəyişdirilməsi və H.Məmmədovun həbsdən azad edilməsi haqqında vəsatət qaldırıb.

Digər vəkil Xalid Bağırov istintaqa H.Məmmədovun separatçı, milliyyətçi fəaliyyətlə məşğul olduğu haqqında məktublar göndərən MTN-in anti-terror mərkəzinin əməkdaşlarının istintaqa çağırılması haqqında vəsatət qaldırıb.

“Bu məktublar dəlillərə əsaslanmır, onlar əsassızdır”, deyə Bağırov bildirib.

Lakin dövlət ittihamçısı sözügedən məlumatın mənbələrinin məxfi olduğuna istinad edərək. vəsatətə etiraz edib.

Sonda hakim üçüncü cəhddə müstəntiq Kərimovun şahid qismində dəvət edilməsi haqqında vəsatəti təmin edib. Eyni zamanda, anti-terror mərkəzinin əməkdaşlarının dəvət edilməsi haqqında vəsatət təmin edilməyib.

Cinayət işinə xitam verilməsi və qətimkan tədbirinin dəyişdirilməsi haqqında vəsatətlərə gəlincə, onlara baxılması üçün məhkəmə müşavirəyə gedib.

İki saat sonra hakim vəsatətlərin təmin edilmədiyini bildirib.

Növbəti iclas avqustun 14-nə təyin edilib. -06C-