Natiq Cəfərli REAL-ın Siyasi Komitəsinin sədri seçilib

"Respublikaçı Alternativ" (REAL) Partiyasının Siyasi Komitəsinin yekdil qərarı ilə Natiq Cəfərli bu qurumun rəhbəri seçilib. 

Qəbul edilmiş qərara əsasən, o, oktyabrın 1-dən partiya lideri qismində fəaliyyətə başlayacaq.

Bu müddət ərzində işlər əvvəlki sədrdən yeni sədrə təhvil veriləcək.

Yeni sədr Siyasi Komitəyə partiyanın gələcək fəaliyyət strategiyasını təqdim edəcək, deyə REAL-ın məlumatında bildirilir.

Cəfərli Turan-ın müxbiri ilə söhbətində qeyd edib ki, partiyanın siyasi kursunda dəyişiklik yoxdur.

O, siyasi qərarların sədr tərəfindən deyil, 8 üzvdən ibarət Siyasi Komitə tərəfindən birlikdə qəbul edildiyini vurğulayıb.

Cəfərli Siyasi Komitənin sədri vəzifəsində partiya təsis edildiyi gündən etibarən onun rəhbəri olan İlqar Məmmədovu əvəz edib. 

O, hələ bir il əvvəl bildirmişdi ki, partiya seçkilərdə uğur əldə etməsə, siyasətdən gedəcək.

"Təbii ki, uğursuzluğumuzu saxtalaşdırmalarla izah etmək asan olardı. Lakin 14 illik qadağadan sonra ilk dəfə iştirak etdiyim 1 sentyabr seçkilərində səslərin əksəriyyətini qazanmış olsam da, real nəticə mənim faktiki qələbəm deyil, seçicilərin 90%-nin seçki məntəqələrinə gəlməməyə qərar verməsi faktı oldu. Nəticədə Asim Mollazadə səsverməyə gəlməyən seçicilərin səsləri sayəsində altıncı dəfə deputat oldu", deyə Məmmədov bildirib.

O, növbəti qurultaya qədər REAL-ın Siyasi Komitəsinin üzvü olaraq qalacaq. Məmmədov açıq siyasi müzakirələrdə iştirakdan yayınmaq niyyətində olduğunu bildirib.