NATO-nun hərbi təhsil ekspertləri Bakıdadır

Bakı/28.02.18/Turan: Bakıda Azərbaycan ilə NATO-nun təhsil üzrə ekspertlərinin görüşü başlayıb. Bu haqda Müdafiə Nazirliyinin mətbuat xidmətinin məlumatında deyilir. Görüş hərbi təhsil sisteminin müəyyən sahələrinin inkişafına yardım üzrə Azərbaycan-NATO Birgə Fəaliyyət Planına əsasən keçirilir.

Silahlı Qüvvələrin Hərbi Akademiyasında keçirilən görüş işçi xarakterlidir.

Tədbirdə "Müdafiə Təhsilinin Genişləndirilməsi Proqramı" çərçivəsində 2017-ci ildə həyata keçirilən fəaliyyətlər təhlil edilib. Həmçinin bu il üçün planlaşdırılan tədbirlər və əməkdaşlığın inkişaf perspektivləri ilə bağlı müzakirələr aparılır.

Xatırladaq ki, Azərbaycan-NATO əməkdaşlığı 1994-cü ildə başlanıb. Bu əlaqələrin əsas tərkib hissəsini hərbi əməkdaşlıq, hərbi modernizasiya, təhlükəsizlik məsələləri üzrə siyasi məsləhətləşmələr və sülhməramlı əməliyyatlar təşkil edib.

2002-ci ildə NATO-nun Praqa sammitində tərəfdaş ölkələrlə əməkdaşlığı genişləndirmək məqsədilə Fərdi Tərəfdaşlıq üzrə Əməliyyat Planı (FTƏP) qəbul edilib. 2003-ci ilin mayında Azərbaycan FTƏP-ə qoşulmaqdan ötrü rəsmi müraciət edib. 2005-ci ilin oktyabrında prezident İ.Əliyev Azərbaycanın NATO ilə Fərdi Tərəfdaşlıq Əməliyyat Planını təsdiq edib.

Ancaq Azərbaycan rəsmiləri son illər açıq bəyan ediblər ki, NATO-ya üzvlük məsələsi qoyulmayıb. -05D-