Naxçıvan istiqamətində Azərbaycan  mövqeləri atəşə tutulub (yenilənib)

Aprelin 1-i saat 22:00-dan 22:20-dək Ermənistan silahlı qüvvələrinin bölmələri Azərbaycan Ordusunun Naxçıvan Muxtar Respublikasının Sədərək rayonunun Heydərabad və Şahbuz rayonunun Biçənək yaşayış məntəqələri istiqamətlərindəki mövqelərini atıcı silahlardan fasilələrlə atəşə tutub. Bu barədə Azərbaycan müdafiə nazirliyinin məlumatında bildirilir.

Öz növbəsində, Ermənistanın Müdafiə Nazirliyi Bakının aprelin 1-də axşam saatlarında Azərbaycan mövqelərinə atəş açılması haqqında iddialarını təkzib edib.

Eyni zamanda, Ermənistan tərəfi bildirib ki, qeyd edilən saatlarda Azərbaycan SQ tərəfindən Kut kəndi (Kəlbəcərlə sərhəddə) istiqamətində və aprelin 2-də Tex kəndi (Laçın rayonu ilə sərhəd) istiqamətində yerləşən Ermənistan mövqelərinə atəş açılıb.

Rəsmi Yerevan Bakının Ermənistan qoşunlarının və texnikasının Azərbaycanla sərhədə yığılması haqqında məlumatını da təkzib edib. Təqdim edilən videokadrlarda arxa cəbhədə müdafiə infrastrukturunun tikintisi əksini tapıb ki, bu da Ermənistanın suveren hüququdur, deyə məlumatda bildirilir.