Naxçıvanda İctimai Palatanın Koordinasiya Şurasının üzvü oğurlanaraq döyülüb

İctimai Palatanın Koordinasiya Şurasnın üzvü İbrahim İbrahimli Naxçıvanda oğurlanaraq naməlum şəxslər tərəfindən döyülüb. İnsident saat 12:00 və 13:00 arası Uzunoba kəndi ərazisində baş verib. 

“Mən Naxçıvana qohumun hüzr yerinə getmişdim. Mərasim zamanı tanımadığım bir neçə adam məni hədələyərək oranı tərk etməyimi tələb etdi. Mərasimdən sonra maşına oturaraq Naxçıvana getdim. Yolda həmin adamların olduğu avtomobil qarşımı kəsdi. Onlar mənim maşından çıxmağımı tələb etdilər, başıma torba keçirdilər və zorla öz maşınlarına oturtdular. Təxminən yarım saat yol getdik. Bu müddətdə məni qaçıranlar kiməsə zəng edərək mənim haqqında məlumat verirdilər. Məni adam olmayan yerə gətirib maşından düşürdülər və döyməyə başladılar. Sonra tələb etdilər ki, bundan sonra Haxçıvan hakimiyyətini tənqid etməyim. Məni təhqir etdilər, əgər “ağıllanmasam” öldürəcəkləri ilə hədələdilər”, - İ.İbrahimli telefonla Turan-a bildirib. 

O, onu oğurlayanların  güc orqanlarıının, ilk növbədə Naxçıvan MTN-in əməkdaşları olduğunu güman edir.

Müxalifətçilərə qarşı bu cür davranış Azərbaycanın bu regionda geniş yayılıb və dəfələrlə baş verib. 

“Bazar günü Bakıya təyyarəyə biletim var və özümə qarşı yeni təxribatları istisna etmirəm”, - o vurğulayıb.-02V-