Nigar Yaqublunun cəzasının cəkilməsi forması yüngülləşdirilib

Şənbə günü müxalif Müsavat Partiyasının gənclər təşkilatının fəalı Nigar Yaqublu azad edilib və evə aparılıb.

Xatırladaq ki, o, 10 sentyabr 2012-ci ildə avqustun 25-də Müsavat Partiyasının Məclis üzvü Aydın Acalovun ölümü ilə nəticələnən YNH törətmək ittihamı ilə həbs edilmişdi.

Dekabrın 19-da Abşeron Məhkəməsi onu cəzasını məntəqə tipli cəzaçəkmə müəssisəsində çəkməklə, 2,5 il müddətinə azadlıqdan məhrum edib. Fevralın 26-da Apellyasiya Məhkəməsi bu qərarı qüvvədə saxlayıb.

Yaqublunun vəkili Nemət Kərimli Turan-ın müxbiri ilə söhbətində bildirib ki, apellyasiya məhkəməsinin qərarından sonra hökm qanuni qüvvəyə minib və fəalın cəzasını çəkməsi üçün Lökbatan qəsəbəsindəki məntəqə tipli cəzaçəkmə müəssisəsinə köçürülməsi haqqında qərar qəbul edilib.

Lakin qanunvericilik məhkumun gündə 12 saat ərzində cəzaçəkmə müəssisəsinin hüdudlarından kənarda, müəssisənin yerləşdiyi yaşayış məntəqəsində olmasına yol verir, deyə vəkil əlavə edib. N.Yaqublu Bakıda yaşadığı üçün cəzasını çəkdiyi müddət ərzində gündə 12 saat azad olacaq.

Bununla belə, müdafiə tərəfi Ali Məhkəməyə şikayət vermək və N.Yaqublunun cəzadan tamamilə azad edilməsinə nail olmaq niyyətindədir.

Azərbaycanın demokratik ictimaiyyətinin qənaətinə görə, hakimiyyət gənc fəalı siyasi motivlərlə cəzalandırmaq üçün YNH-dən istifadə edib. Onlar N.Yaqublunun məhkəmədən əvvəl həbs edilməsini və ona təyin edilən cəzanı həm onun özünün, həmçinin atasının - Müsavat Partiyasının sədr müavini Tofiq Yaqublunun müxalif fəaliyyətinə görə təqib hesab edirlər.

Xatırladaq ki, fevralın 4-də T.Yaqublu özü də 23-24 yanvar İsmayıllı hadisələri ilə əlaqədar həbs edilib. -06B-