Noyabrın 9-da Bakıda Ukrayna Mərkəzinin açılışı olub

Açılışda Ukraynanın Azərbaycandakı səfiri Yuri Qusev, Avropa İttifaqının Azərbaycandakı səfiri və digər ölkələrin səfirləri, eyni zamanda ictimaiyyət nümayəndələri iştirak edib.

Mərkəzin rəhbəri Olqa Quseva bildirdi ki, qurumun məqsədi uzun illər davam edən Ukrayna-Azərbaycan mədəni əlaqələrini daha da genişləndirməkdir. O, yerli və beynəlxalq tərəfdaşlara təşəkkürünü bildirib.

O.Quseva qeyd edib ki, Mərkəzdə Ukrayna filmlərinin nümayişləri, sərgilər, teatr tamaşaları, musiqi və moda axşamları keçiriləcək. Eyni zamanda Mərkəzdə Ukrayna dilinin kursları və Ukrayna tarixi ilə bağlı mühazirələr təşkil olunacaq.

Mərkəzdə iki fotosərgi təşkil olunub. Onlardan biri - “Arzum var” adlı sərgi müxtəlif müəlliflərin fotoşəkillərdən ibarətdir və onun mövzusu Ukraynadakı müharibədir. Digər fotosərgi isə “Uşaqların düşüncələri” adlanır.

Ukraynanın Azərbaycandakı səfiri Yuri Qusev Azərbaycanla Ukraynanın yaxın və uzun illər davam edən diplomatik əlaqələri ilə bağlı danışarkən eyni zamanda iki ölkə arasında siyasi, mədəni və iqtisadi əlaqələrin uzun illər davam etdiyini qeyd edib.

Səfir qeyd edib ki, Mərkəz əvvəlki illərdə də fəaliyyət göstərib, indi isə yenilənib və hazırda işləməyə davam edəcək. O, Azərbaycana və beynəlxalq tərəfdaşlara dəstəyə görə təşəkkürünü bildirib: “ABŞ, Böyük Britaniyaya, Avropa İttifaqına və bu çətin zamanlarda Rusiya Federasiyasının başladığı müharibədən qaçmağa məcbur olan vətəndaşlarımıza dəstək verənlərin hamısına təşəkkür edirəm. Mən, Ukrayna vətəndaşlara təşəkkür edirəm. Ümid edirəm ki, bu Mərkəz Ukrayna mahnıları səslənən, Ukrayna mədəni dəyərləri təbliğ edilən məkana çevriləcək”.

Azərbaycandakı Ukrayna Konqresinin İdarə Heyətinin sədri Yuriy Osadçenko bildirib ki, Qarabağ müharibəsində ukraynalılar iştirak edərək Vətənə borcunu ödəyiblər: “İndi də Ukraynada gedən müharibədə azərbaycanlılar da iştirak edir və 50 nəfərə yaxın artıq həlak olub. Ukrayna bu gün qanlı müharibəni aparır. Bu, iki sistemin – demokratiyaya, azadlığa can atan və şimali qonşumuzun despotik insanların arasında gedir. Amma sonda Ukrayna qalib gələcək”.

Turanın suallarını cavablandıran səfir Yuri Qusev bildirib ki, Rusiyanın Ukraynaya hücumundan ilk günlərindən Azərbaycanın Ukraynaya göstərdiyi humanitar yardımın məbləği 40 milyon dollara yaxındır: “Azərbaycan Prezidenti İlham Əliyev Ukrayna Prezidenti Vladimir Zelenskiyə ünvanladığı məktubda qeyd olunub ki, humanitar yardımın göstərilməsi davam ediləcək. Azərbaycan həmişə Ukraynanın ərazi bütövlüyünü dəstəkləyib və ümid edirik ki, dəstəkləməyə davam edəcək. Biz Azərbaycanla strateji tərəfdaşıq və bu, bizim üçün çox vacibdir”.

Səfir qeyd edib ki, Ukrayna dövləti Ukrayna və Azərbaycan universitetlərin əməkdaşlığında maraqlıdır və bu məsələ COP29 çərçivəsində müzakirə olunacaq.

V.Zelenskinin COP-29 konfransında iştirak edib etməyəcəyi ilə bağlı Y.Qusev bildirib ki, bu barədə yaxın zamanda məlumat veriləcək.