Obama administrasiyasında əsas təyinatlar

ABŞ prezidenti Barak Obama yeni administrasiyasında iki əsas vəzifəyə namizədlərin adlarını açıqlayıb: o, keçmiş senator Çak Heygeli müdafiə naziri, terrorizmə qarşı mübarizə üzrə hazırki müşaviri Con Brennanı MKİ rəhbəri təyin etməyi təklif edir.

Bir müddət əvvəl ABŞ dövlət katibi vəzifəsinə namizəd elan olunmuş senator Con Kerri ilə birlikdə, Heygel və Brennan da Obananın ikinci prezidentlik dövründə ABŞ administrasiyasının onurğasını təşkil edəcəklər.

Son illər Heygel Corctaun Universitetində işləyib və eyni zamanda prezidentin kəşfiyyat məsələləri üzrə müşavirlər qrupunun həmsədri olub. Müşahidəçilərin fikrincə, onun namizədliyinin senat tərəfindən təsdiq edilməsi prosesi heç də asan olmayacaq.

Qanunvericilər artıq Heygelin dəfələrlə səsləndirdiyi bəyanatları xatırlayıblar və dinləmələrdə onu diqqətlə “dindirmək” niyyətindədirlər. Xüsusən, Heygelin Yaxın Şərqlə bağlı mövqeyinin izah edilməsini tələb edəcəklər. O, bir müddət əvvəl Amerika konqresinin “yəhudi lobbisinin” təsiri altında olduğu haqqında ifadələri, habelə “Həmas” hərəkatı və İranla diplomatik münasibətlər qurulması zərurəti haqqında bəyanatları ilə səs-küy yaradıb.

Heygeldən homoseksuallar da razı deyil, onlar dəfələrlə ona 1998-ci ildə Lüksemburqda səfir vəzifəsinə namizədin seksual orientasiyası haqqıda ifadələrini dəfələrlə xatırladıblar. Baxmayaraq ki, Heygel sonradan üzr istəyib.

11 sentyabr 2001-ci il terror aktından sonra Terrorizmə qarşı Milli Mübarizə Mərkəzinə rəhbərlik edən və “bir nömrəli terrorist” Usama ben Ladenin məhvi üzrə əməliyyatın əsas təşkilatçılarından biri olan Con Brennanın təsdiq edilməsində də problemlər ola bilər. Müzakirələr zamanı kiçik Corc Buşun prezidentliyi dövründə Brennanın MKİ-də müxtəlif vəzifələr tutduğu zaman məxfi həbsxanalar və məhbuslara işgəncələr haqqında xoşagəlməz suallar ortaya çıxa bilər. -0-