Ölkədən qaçan MTN-çi "Azadlıq"a yeni şok faktlar açıqladı

"Turac Zeynalovun bildiyi sirr yayılsaydı...; Jurnalisti İrana ötürüb orada asdırmaq istəyirdilər..."

Təqiblərdən yaxa qurtararaq ölkədən qaçan Naxçıvan MTN-nin əməkdaşı İbrahim Musayev "Azadlıq" radiosunun əməkdaşı Yafəz Əkrəmoğlu ilə bağlı qurulan plan barədə qəzetimizə ötən yazılarda qısa məlumat vermişdi. Bu yazıda isə o, planla bağlı bildiklərini ətraflı danışır.

"Mən Turac Zeynalovun işi ilə lap əvvəldən tanışam. Turac məxfi sirr bilirdi. Ona görə öldürdülər ki, həmin sirrin üstü örtülsün. Turacın bildiyi sirr yayılsaydı, Naxçıvan hakimiyyətinin bütün iç üzü açılmış olardı. Bu sirr haqda daha sonra məlumat verəcəyəm. 
Turacı MTN-də asaraq öldürəndən sonra cidd-cəhdlə çalışırdılar ki, bunu ört-basdır eləsinlər. İstəmirdilər ki, mətbuatda yayılsın. Qohumlarına hədə-qorxu gəlmişdilər ki, mətbuata danışmasınlar. Bu arada MTN-ə məlumat daxil oldu ki, "Azadlıq" radiosunun əməkdaşı Yafəz Əkrəmoğlunu Turacın ölümünü araşdırmaq üçün Naxçıvana göndərirlər. MTN-də şöbə müdiri olan İlqar Hacıyevin göstərişi ilə biz hərəkətə keçdik. Jurnalsit təyyarədən enən kimi onu nəzarətə götürdük. Bilirdik ki, Turacgilin kəndinə gedəcək. İlqarın göstərişi ilə Turacın ailəsinə bir daha tapşırıldı ki, Bakıdan gələn jurnalistə heç nə deməsinlər. Ancaq Yafəz Əkrəmoğlu Turacla həbs olunanların qohumları vasitəsi ilə onun öldürülmə səbəbinin izinə düşmüşdü. Yenə deyirəm, bu sirr açılsaydı, Naxçıvan hakimiyyəti bütün dünyada biabır olacaqdı.

Yafəz Əkrəmoğlu

Ona görə də MTN əlilə Yafəz Əkrəmoğlu şəhərdən oğurlanıb Culfadan İrana deportasiya edildi. Onu oğrlayanlar 3 nəfər MTN işçisi idi. İlqar jurnalsitdən çox acıqlı idi. Əvvəllər də həmişə deyirdi ki, bu adam Naxçıvan haqqında yalan məlumatlar yazıb. Ona qarşı çoxlu planlar qurmuşdu, ancaq baş tutmamışdı. İlqarın növbəti planı belə idi ki, deportasiyadan bir neçə saat sonra müəyyən xətlə İran ETELLEAAT-ına məlumat ötürsün ki, Amerika radiosunun əməkdaşı İrana casusluğa gəlib. Belə olanda İran kəşfiyyatı onu tutub edam edəcəkdi. Sonradan bu fikirdən daşınmışdılar. Eşitdiyimə görə, Bakıdan zəng gəlmişdi. Yafəz Əkrəmoğlu Bakıya gedəndən, MTN tərəfindən oğurlanıb İrana deportasiya olunduğunu açıqlayandan sonra daha da qəzəblənmişdilər. Onun haqqında yalançı imici yaratmaq üçün videorolik hazırlayıb "youtube"yə qoymuşdular. 
Bundan sonra Yafəz Əkrəmoğlu ilə görüşən şəxslərin hamısını MTN-ə gətirib sorğu-suala tuturdular. 
Jurnalist növbəti dəfə Naxçıvana gələndə ona şantaj planları qurmuşdular. Bu plana MTN-in əməkdaşı Nurlan Pənahov rəhbərlik edirdi. Məqsəd nə yolla olursa-olsun jurnalistin gizli görüntülərini əldə etmək idi. Bu əməliyyata jurnalistin inandığı adamlardan birini də cəlb eləmişdilər. Onun adı İsmayıl idi. Bir neçə də qadın cəlb olunmuşdu. Yafəz Əkrəmoğlunun gedəcəyi evə əvvəlcədən kamera quraşdırılmışdı. Bu ev Naxçıvan şəhərində, 3-cü mikrorayondakı Heydər Əliyev adına orta məktəbin yaxınlığındadır, mənzil 4-cü mərtəbədədir. Kamera evdəki televizorun pult yerində, bir də elektron saatın içərisində yerləşdirilmişdi. Kameralar distansiyalı idi. 7-8 metrə kimi ötürə bilirdi. 4-5 saat "zaryadka" saxlayırdı. Həmin binanın 2-ci mərtəbəsində kameranın dalğasını tutan aparat yerləşdirilmişdi. Nurlanla 2-ci mərtəbədə oturub 4-cü mərtəbədə baş verənləri izləyirdik. Qadın məsələsi alınmırdı. Qadın evə girən kimi Yafəz hər şeyi hiss eləmişdi. Qadına göstəriş verilmişdi ki, gizli çəkiliş baş tutmasa, üst-başını cırıb qışqırıq salsın ki, guya ona təcavüz edirlər. Jurnalist hər şeyi anladığından ağıllı plan quraraq vəziyyətdən çıxdı, sonra evi tərk elədi. İlqargil çox pis vəziyyətdə qalmışdılar. İstəyirdilər ki, gizli görüntünü əldə edib onu şantaj eləsinlər, bununla da onu biryolluq susdursunlar. Başqa planlar qurmaq istəyirdilər, lakin jurnalist gecə reysi ilə Naxçıvanı tərk eləmişdi".