Pan Gi Mun: Hüquq müdafiəçilərinə toxunmayın!

Cümə axşamı Cenevrədə İnsan Hüquqları Şurasının sessiyası çərçivəsində BMT ilə əməkdaşlıq edən şəxslərin təqibi haqqında müzakirələr keçirilib. BMT baş katibi Pan Gi Mun video müraciətlə iştirakçılara üz tutub, BMT-nin hüquq müdafiə mexanizmləri ilə əməkdaşlıq etdiklərinə görə insanların təqibi faktlarını qeyd edib və bu biabırçı təcrübəyə son qoymağa çağırıb, xəbəri BMT-nin saytı yayıb.

“Son iyirmi ildə BMT-nin baş katibləri müntəzəm olaraq BMT ilə insan hüquqları sahəsində əməkdaşlıq edən şəxslər barəsində repressiya halları haqqında məlumatlar alıb. Mənə yalnız adıma məktub yazılmasını koordinasiya etdiklərinə görə həbsə düşən şəxslər, habelə İnsan Hüquqları Şurasının müntəzəm xülasəsi üçün məruzə göndərdiyinə görə ölkəsini tərk etmək məcburiyyətində qalan şəxs barədə məlumat veriblər”, deyə baş katib qeyd edib. O bildirib ki, bu haqda mövcud məlumat aysberqin yalnız görünən tərəfidir.

BMT Baş Katibliyi bu məsələ ilə bağlı daha əvvəl təqdim etdiyi məruzədə ötən il dünyanın ən az 12 ölkəsində onlarla hüquq müdafiəçisinin ciddi repressiyalar və hədə-qorxularla qarşılaşdığına diqqət çəkib. Hüquq müdafiəçiləri işgəncələrə məruz qalır, qanunsuz saxlanılır və döyülür. Bu insanlar xaricə buraxılmır.

BMT baş katibi bir sıra dövlətlərin bu halların lazımi şəkildə araşdırılması üçün ciddi tədbirlər görməməsinə təəssüfünü ifadə edib və bütün dünya ölkələrinin hökumətlərini BMT ilə insan hüquqları sahəsində əməkdaşlıq edən şəxslərin müdafiəsini təmin etməyə çağırıb.

Qeyd edək ki, Azərbaycanda hüquq müdafiəçilərinin təqibi və həbsi faktları geniş yayılıb. Belə ki, son illər ona yaxın hüquq müdafiəçisi və hüquq müdafiə təşkilatı həbslərə və digər təqiblərə məruz qalıb.

Hazırda dörd hüquq müdafiəçisi – Vidadi İsgəndərli, Taleh Xasməmmədov, İlham Əmiraslanov və İlqar Rzayev həbsdədir. -02D-