Parlamentin daimi komitələrinin sədrləri seçilib

VII çağırış Milli Məclisin ilk plenar iclasında parlamentin daimi komitələrinin sədrləri seçilib.

Əli Hüseynli hüquq siyasəti və dövlət quruculuğu komitəsinin sədri vəzifəsində qalıb.

Lakin keçən çağırış parlamentdə o, bu vəzifəni vitse-spiker vəzifəsi ilə birlikdə icra edirdi.

Siyavuş Novruzov regional məsələlər komitəsinin sədri seçilib.

Anar İsgəndərov elm və təhsil komitəsinin, Arzu Nağıyev müdafiə, təhlükəsizlik və korrupsiyaya qarşı mübarizə komitəsinin sədri seçilib.

Zahid Oruc yenidən insan hüquqları komitəsinin sədri, Sadiq Qurbanov təbii resurslar, energetika və ekologiya komitəsinin sədri seçilib.

Azər Əmiraslanov iqtisadi siyasət, sənaye və sahibkarlıq komitəsinə, Tahir Rzayev isə aqrar siyasət komitəsinə rəhbərlik edəcək.

Musa Quliyev əmək və sosial siyasət komitəsinin rəhbəri vəzifəsində qalıb.

Polad Bülbüloğlu mədəniyyət, Səməd Seyidov növbəti dəfə beynəlxalq münasibətlər və parlamentlərarası əlaqələr komitəsinin sədri seçilib. Əhliman Əmiraslanov səhiyyə komitəsinin, Hicran Hüseynova isə ailə, qadın və uşaq məsələləri komitəsinin sədri vəzifəsində qalıb.

Şahin İsmayılov gənclər və idman komitəsinin sədri seçilib, parlament azlığının nümayəndəsi Fazil Mustafa isə ictimai birliklər və dini qurumlar komitəsinin sədri vəzifəsinə təyin edilib.

Parlamentin iclasında komitələrin sədr müavinləri də təsdiq edilib.