Partiya sədrləri hakimiyyətlə görüşlərin davam etməsini vacib sayırlar

“Azadlıq-2015” Seçki Blokuna daxil olan partiyaların liderləri çərşənbə günü Klassik Xalq Cəbhəsi Partiyasının ofisində mətbuat konfransı keçiriblər.

Mətbuat konfransı noyabrın 1-də keçirilmiş parlament seçkilərinə blokun münasibətilə bağlı olub. Partiya sədrləri seçkilərə qatılmaqlarına başlıca səbəb kimi “dövlətçiliyə olan təhdidləri nəzərə almalarını, dövlətçiliyi qorumağın vacibliyini” göstəriblər.

   Blokun Seçki Qərargahının rəhbəri Bəybala Əbil blok tərəfindən 72 namizəd irəli sürüldüyünü, onlardan yalnız 20-sinin qeydə alındığını, bloka daxil olan bir çox partiyaların sədrlərinin belə qeydə alınmadığını vurğulayıb. B.Əbil seçki prosesində namizədlərə təbliğat şəraiti yaradılmaması, seçicilərlə görüşə imkan verilməməsi, namizədlərin qeydə alınmasına imza verən seçicilərin, hətta onların qohum - əqrəbasının təzyiqlərə məruz qalması kimi tipik hüquq pozuntuları olmasına diqqət çəkib.

B.Əbil ölkədə seçki adına hər-hansı müsbət bir halın nəzərə çarpmadığını, yalnız iqtidarın kamil “saxtakarlıq mexanizmi”nin olduğunu qeyd edib.

Xalq Partiyasının sədri Pənah Hüseyn də bu seçkilərdə ciddi seçki saxtakarlıqlarının olduğunu nəzərə çatdırıb. Namizəd olduğu Sabirabad 63-cü seçki dairəsində deputat seçilsə də, qələbəsinin rəsmiləşdirilmədiyini söyləyib. O, adı çəkilən seçki dairəsindən yetərli qədər audio-video, foto materiallara malik olduqlarını bildirib.

Hakimiyyət təmsilçilərilə görüşlərin davam etdirilməsinə gəlincə, P.Hüseyn bu görüşlərin bir seçkiyə hesablanmadığını, bunun strateji məsələ olduğunu iddia edib.

   Parlamentin təkibinə gəlincə, P.Hüseyn heç nəyin dəyişmədiyini, 5 il öncə nə idisə yenə də həmin parlament olduğunu deyib. “Amma ölkədə dövlətçiliyin inkişafı üçün növbəti şans daha bir müddətə itirildi” - deyə P.Hüseyn parlament seçkilərinin nəticələrinə münasibətini ifadə edib.

   Digər partiya sədrləri də namizəd olduqları seçki dairələrində rast gəldikləri saxtakarlıqlar barədə danşıblar. Amma bununla belə, partiya liderləri hakimiyyət təmsilçilərilə müxalifət təmsilçiləri arasında görüşlərin davam etdirilməsini vacib sayıblar. Patiya liderləri hakimiyyəti 100 minləri öz seçki adına “seçki saxtakarlıqları cinayəti”nə şərik etməkdə suçlayıblar.

KXCP məsulu Teyyub Xəzər blokun seçkilə bağlı yaradıldığını nəzərə çatdıraraq, partiya liderlərinə bu bloku hansısa bir birlik platformasına döndərməyi təklif edib. Bir çox partiya liderləri T.Xəzərin təklifinə dəstək veriblər.

“Azadlıq-2015” Seçki Bloku parlament seçkilərilə bağlı bu ilin yayında təsis edilib. Quruma Klassik Xalq Cəbhəsi, Xalq, Vətəndaş və İnkişaf, Liberal Demokrat, Böyük Azərbaycan, Azadlıq, Aydınlar partiyaları daxildir. -05C-