Paşinyan baş qərargah rəisini vəzifədən azad edib

Yerevan/25.02.21/Turan: Ermənistan baş naziri Nikol Paşinyan baş qərargah rəisi Onik Qasparyanı vəzifədən azad edib. O, Ermənistanın yüksək vəzifəli hərbiçilərinin baş nazirin istefası tələbi ilə yaydığı birgə bəyanatdan dərhal sonra Facebook-da canlı efirə çıxaraq, bu barədə məlumat verib.

"Vəziyyət çox mürəkkəbdir. Bilirsiniz ki, mən Baş Qərargah rəisini və onun birinci müavinini vəzifədən azad etmək qərarı qəbul etmişəm. Bu qərarların səbəbini meydanda açıqlayacağam. İndi ən mühüm vəzifə vətəndaş və xalq hakimiyyətini qoruyub saxlamaqdır", deyə o qeyd edib.

Paşinyan bildirib ki, Qarabağda baş verən müharibəyə görə bütün məsuliyyəti öz üzərinə götürüb, amma indi elə vəziyyət yaranıb ki, cəmiyyətin yüksək vəzifəli hərbiçilərə bəzi sualları yaranıb və "bu suallardan qaçmaq qeyri-mümkündür" ("İsgəndər" raketləri niyə işə düşməyib?).

Baş nazir hesab edir ki, bəzi generallar buna cavab verməlidirlər, bu səbəbdən onlar onu istefaya çağırmaq qərarına gəliblər. -02D-