Pərviz Həşimlinin ailə üzvləri və vəkili mətbuat konfransı keçirib

Oğlum Pərviz Həşimlinin günahı yoxdur. Ona qarşı irəli sürülən ittihamların hər-hansı əsası yoxdur. Mən terrorçu, Əl-Qaidəçi övlad böyütməmişəm. Mənim övladlarım və şagirdlərim yüksək təhsilə malik ziyalılardır. Bu bəyanatla bu gün sentyabrın 17-də həbs edilən jurnalist, hüquq müdafiəçisi Pərviz Həşimlinin müdafiəsi məqsədi ilə keçirilən mətbuat konfransına onun atası Kamran Həşimli çıxış edib. 

Kamran Həşimli 40 ildir kimya dərsi tədris edir, iqtidarda olan Yeni Azərbaycan Partiyasının üzvüdür. 

“Bizim Yol” qəzetinin müxbiri, moderator.az saytının direktoru, hüquq müdafiəçisi Pərviz Həşimli qaçaqmalçılıq və qanunsuz silah saxlama ittihamı ilə Milli Təhlükəsizlik Nazirliyi (MTN) tərəfindən həbs edilib. O, redaksiyadan adına guya Gəncədən sovqat gətirmiş bir şəxs (Təvəkkül Qurbanov) tərəfindən redaksiyadan küçəyə dəvət edilib. Həşimli ona çatan kimi MTN əməkdaşları tərəfindən saxlanıb. 

MTN-in İctimaiyyətlə Əlaqələr Mərkəzinin məlumatına görə, Pərviz Həşimli və Təvəkkül Qurbanov qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələrində nəzərdə tutulan cinayətləri törətməkdə şübhəli bilindiklərinə görə tutulub. 

Sentyabrın 18-də məhkəmə Həşimlinin barəsində iki aylıq həbs qətimkan tədbiri seçib. Həşimli müxalifətdə olan Xalq Cəbhəsi Partiyasının Ali Məclisinin üzvüdür. 

Atası bildirib ki, MTN son dövrlərdə Pərvizə Həşimlini ələ almaq təşəbbüsündə olub. Bununla bağlı ona təzyiqlər olub, jurnalist izlənib. Jurnalist MTN-in təkliflərini qəbul etməyib. “Pərvizə təzyiqlər edilib ki, AXCP sədrin Əli Kərimlinin əleyhinə bəyanatlar versin. O, bunu qəbul etməyib”, deyə K.Həşimli qeyd edib. 

Jurnalistin həyat yoldaşı İlahə Həşimli MTN əməkdaşlarının evlərinə basqın etdiyini deyib. Onun sözlərinə görə, evlərində hər-hansı silah və sursatın olmasından söhbət gedə bilməz. 

“20-dən çox MTN əməkdaşı evimizə hücum etdi. Onlar məhkəmə qərarı olmadan evimizə girdilər. Evimin pəncərəsinin dəmir reşotkasını qırıb içəri daxil oldular. Bundan sonra icazəm olmadan, məhkəmə qərarı təqdim edilmədən, məndən heç nə soruşmadan axtarışa başladılar. Guya divanın altından uşağımın oyuncağının yanından tapança tapdıqlarını dedilər. Sonra isə həyətdə balaca “əl damı” dediyimiz yerdən bir salafan torba çıxardılar. Torbanın içərisində kağıza bükülmüş qumbaralar var idi. Bunların hamısı MTN-çilər tərəfindən qoyulub. Sonda isə tərtib etdikləri protokolu mənə təqdim etmədilər”, deyə o qeyd edib. 

“Milli təhlükəsizlik naziri prezidentin qarşısında əlini qurana bassın ki, doğrudan da oğlumun evindən silah-sursat tapılıb və ya onun silahla əlaqəsi var. Azərbaycan yeganə ölkədir ki, məmurlar prezidentə yalan məlumatlar verir”, deyə Kamran Həşimli bildirib. 

İlahə Həşimova deyib ki, MTN-çilər evin həyətinə daxil olan kimi orada ailənin evinin təhlükəsizliyi üçün quraşdırdığı videokameraları zərəsizləşidirib, qırıb. 

Vəkil Elçin Sadıqovun fikrincə, Pərviz Həşimlinin həbsi qanunsuzdur. Ona qarşı irəli sürülən ittihamların isə əsası yoxdur və sübut olunmayıb. “Təvəkkül Qurbanov deyib ki, İrandan Pərviz Həşimliyə çatacaq 6 Makarov tapançası və 40 güllə gətirib. Pərviz Həşimli həmin şəxsi tanımır və bir dəfə belə görməyib”, deyə vəkil qeyd edib. 

Onun sözlərinə görə, MTN-in əməkdaşları Pərviz Həşimlinin həbsi zamanı və dünən məhkəmədə ona qarşı insan şəxsiyyətini alçaldan hərəkətlər ediblər. “Saxlama zamanı Pərvizə qarşı güc təbiq olunub, onun dizində və qolunda zədə var. Məhkəmədən sonra isə jurnalistin başına torba keçiriblər. Bunlar Azərbaycan qanunvericiliyinə və Avropa İnsan Haqları Konvensiyasına ziddir”, deyə Sadıqov bildirib. 

Vəkil cinayət içinin istintaqının MTN-dən alınaraq Baş Prokurorluğa verilməsini istəyir. “Çünki MTN jurnalistə qarşı qərəzlidir”, deyə o qeyd edib. 

Mətbuat konfransında iştirak edən AXCP mətbuat xidmətinin rəhbəri Natiq Ədilov AXCP adından Pərviz Həşimliyə və onun ailəsinə təşəkkür bildirib. “O, ağır günlərində belə əqidəsindən dönməyib. Pərviz Həşimlinin həbsi siyasi sifarişdir. Bu həbs yalnız Həşimliyə qarşı deyil, AXCP və onun sədri Əli Kərimliyə qarşı da yönəlib”, deyə o qeyd edib. -03C-