Prezident İlham Əliyev hesab edir ki, Brüssel görüşü Azərbaycana qarşı yönəlib

Azərbaycan-Türkiyə birliyinin daha da güclənməsi önəmlidir, çünki Cənubi Qafqazda proseslər çox təhlükəli istiqamətdə gedir və “böyük fəlakətə” gətirə bilər. Bu barədə cümə günü prezident İlham əliyev Mövlud Çavuşoğlunun rəhbərliyilə NATO Parlament Assambleyasında Türkiyə nümayəndə heyətini qəbul edərkən bildirib.

Onun sözlərinə görə, Azərbaycana təzyiq davam edir və bu, Avropa Parlamentinin qətnamələrində, Azərbaycan nümayəndə heyətinin AŞPA-da səsvermə hüququndan məhrum edilməsində özünü göstərir. " Bunlar çox mənfi fəsadlara gətirə biləcək addımlardır və bunun yeganə səbəbi Qarabağı işğaldan azad etməyimizdir”, - Əliyev hesab edir.

Bu gün Brüsseldə ABŞ- Avropa İttifaqı- Ermənistan görüşünə toxunan dövlət başçısı bildirib ki, bununla Cənubi Qafqaz üçün növbəti təhlükə mənbəyi yaradılır.

“Son günlər həm ABŞ-ın, həm də Avropa İttifaqının yüksək vəzifəli şəxsləri bizi inandırmağa çalışmışlar ki, bu görüş Azərbaycanın əleyhinə deyil. lakin biz bunun Azərbaycanın və Cənubi Qafqazda iş birliyinin əleyhinə olduğunu bilirik. Bu, ayırıcı xətlərin yaradılması və ölkəmizi təcrid etmək məqsədi güdür”, - Əliyev deyib.

Onun sözlərinə görə, Qərbin Ermənistanı Cənubi Qafqazda  silahlı forpost kimi yaratmaq cəhdləri gələcəkdə çox böyük fəsadlar törədəcək.

Odur ki, hazırkı geosiyasi vəziyyətdə Azərbaycan-Türkiyə birliyinin möhkəmliyini qorumaq vacibdir, Əliyev qeyd edib.