Prezident İlham Əliyev İsrail şirkətlərini Ələt iqtisadi zonasına dəvət edib və SOCAR-a İsraildə neft çıxarmağı təklif edib /YENİLƏNİB/

Prezident İlham Əliyev İsrailin xarici işlər naziri Eli Kohen ilə görüş zamanı Azərbaycan-İsrail siyasi münasibətlərini yüksək qiymətləndirib. O, Azərbaycanın İsraildə səfirliyinin açılmasını dostluq, qarşılıqlı etimad, hörmət və dəstəyə əsaslanan bu münasibətlərin səviyyəsinin göstəricisi adlandırıb.

Dövlət başçısı əməkdaşlığın gündəliyinin genişləndiyini deyərək hökumətlərarası birgə komissiyanın fəaliyyətini xüsusi qeyd edib. Azərbaycanda iqtisadiyyatın modernləşdirilməsi prosesi gedir və texnologiyalar sahəsində, o cümlədən yaşıl enerji, ağıllı şəhər və ağıllı kənd konsepsiyaları ilə bağlı təcrübə mübadiləsi önəmlidir.

Əliyev Ələt azad iqtisadi zonasında yaradılmış şərait barədə məlumat verbi, İsrail şirkətlərini buraya dəvət edib. Həmçinin SOCAR-ın İsraildə karbohidrogen resurslarının istismarında iştirakı imkanlarına baxılmasının da önəmini vurğulayıb.

Azərbaycanın İsraildə səfirliyinin açılmasını yüksək qiymətləndirən və bunun ölkələrimiz arasında strateji əlaqələr qurulması işinə töhfə verəcəyinə ümidvar olduğunu bildirən İsrailin xarici işlər naziri İsrail və Azərbaycan arasındakı əlaqələrin strateji xarakter daşıdığını vurğulayıb.

Azərbaycana geniş nümayəndə heyəti ilə səfər etdiyini vurğulayan nazir turizm sahəsində əlaqələ toxunaraq, ölkəsindən Azərbaycana gələn turistlərin sayının artmaqda olduğunu qeyd edib. O, ölkələrimiz arasında ticarət dövriyyəsinin artım tempinin müşahidə olunduğunu deyərək, bunun daha da artırılması üçün geniş imkanların olduğunu bildirib.

Görüşdə iqtisadiyyat, enerji, kənd təsərrüfatı, bərpa olunan enerji, investisiyalar, elm, təhsil, mədəniyyət, turizm, təhlükəsizlik sahələrində və digər sahələrdə əməkdaşlığın inkişafı üçün geniş imkanların olduğu vurğulanıb. Həmçinin su resurslarının idarə olunması və dəniz suyunun şirinləşdirilməsi, səhralaşma prosesinin qarşısının alınması, səhra və yarımsəhra şəraitində kənd təsərrüfatının inkişaf etdirilməsi sahələrində İsrailin təcrübəsinin Azərbaycan üçün maraqlı olduğu qeyd edilib. 0

*   *   *

2023 Aprel 19 (Çərşənbə) 11:50:36

Prezident İlham Əliyevlə Eli Kohen təhlükəsizlik və iqtisadi əməkdaşlıq məsələlərini müzakirə ediblər

Bakı/19.04.23/Turan: Aprelin 19-da prezident İlham Əliyev Bakıda rəsmi səfərdə olan İsrailin xarici işlər naziri Eli Koheni qəbul edib.

"Azərbaycan prezidenti ilə əla görüş oldu. Biz terrorizmlə mübarizəni, təhlükəsizliyin genişləndirilməsini və ölkələr arasında iqtisadi əməkdaşlığı müzakirə etdik.

Mən İsraildə  səfirlik, şiə müsəlman ölkəsinin ilk səfirliyinin açılması qərarı  ilə əlaqədar prezidenti təbrik etdim. Bu, İsrail dövlətinin dünyada yüksək hörmətini göstərir", - Cohen görüşün yekunları ilə bağlı Tvitter hesabında yazıb.

İsrailin Xarici İşlər Nazirliyinin rəhbəri aprelin 18-də Bakıya gəlib. Həmin gün o, iqtisadiyyat naziri Mikayıl Cabbarovla görüşüb.

“İsraildə Azərbaycan səfirliyinin açılması ikitərəfli münasibətlərin yeni mərhələyə yüksəldiyini göstərir. Azərbaycan-İsrail hökumətlərarası birgə komissiya, həmçinin Azərbaycanın İsraildəki Ticarət nümayəndəliyi iki ölkə arasında tərəfdaşlığın inkişafı üçün əhəmiyyətli platformalardır.

İsrail Azərbaycanın əsas ticarət tərəfdaşları sırasındadır. İsraillə qarşılıqlı investisiyalar energetika, kənd təsərrüfatı, informasiya texnologiyaları, innovasiya, əczaçılıq, turizm və digər sahələri əhatə edir.

İsraillə innovativ inkişaf və rəqəmsal iqtisadiyyat sahəsində əməkdaşlıq Azərbaycan üçün xüsusi önəm daşıyır”, - Cabbarov qeyd edib.

Öz növbəsində Eli Kohen deyib ki, onun ölkəsi Azərbaycanla əlaqələrin genişlənməsinə önəm verir, İsrail şirkətləri müxtəlif sahələrdə tərəfdaşlığa maraq göstərirlər. O, əməkdaşlığın gücləndirilməsi üçün geniş imkanların olduğunu vurğulayıb.

Sonra Eli Kohen Bakıda sinaqoqda yəhudi icmasının üzvlərilə görüşüb.  “Azərbaycan yəhudi icmalarına həmişə hörmətlə yanaşan ölkədir və xalqlarımız arasında əlaqə dərindir. Mən İsraildə Azərbaycan səfirliyinin açılmasından məmnunam və icma üzvlərinə dedim ki, İsrail hər zaman onların evi olacaq”,  – Kohen Tvitter-də yazıb. 16D