Prezident İlham Əliyev Qarabağ nizamlanmasının şərtlərini açıqlayıb

Qarabağ münaqişəsi yalnız Azərbaycanın ərazi bütövlüyü çərçivəsində həll olunmalıdır və ATƏT-in Minsk Qrupunun həmsədr ölkələri də bunu dəstəkləyir. Prezident İlham Əliyev aprelin 9-da hökumətin iclasında bildirib.

Onun sözlərinə görə, həmsədr dövlətlər bu il danışıqların davam etdirilməsi istiqamətində yeni təkliflər irəli sürüblər. 

“Amerika Birləşmiş Ştatlarında olarkən Amerikanın siyasi rəhbərliyi ilə, o cümlədən Dağlıq Qarabağ münaqişəsi geniş şəkildə müzakirə edilib. Qeyd ediblər ki, onlar Azərbaycanın ərazi bütövlüyünü dəstəkləyirlər. Bütün həmsədr ölkələr - ABŞ, Rusiya, Fransa Azərbaycanın ərazi bütövlüyünü dəstəkləyir. Dünyada Ermənistandan başqa elə bir ölkə yoxdur ki, bizim ərazi bütövlüyümüzü dəstəkləməsin. Görünür ki, danışıqlarda mümkün ola biləcək müsbət dinamika Ermənistanın bu təxribata getməsini (aprelin 2-də cəbhə xəttində vəziyyətin gərginləşməsi)”, - İ.Əliyev bildirib.

Vəziyyətin sabitləşdirilməsi ilə bağlı beynəlxalq birliyin çağırışlarına münasibətini bildirən İ.Əliyev deyib ki, Azərbaycan danışıqlar prosesinə sadiqdir.

“Bu gün də biz bəyan edirik ki, danışıqlar prosesinə sadiqik. Ümid edirik ki, bu danışıqlar məsələnin həllinə gətirib çıxaracaq. Məsələnin həlli çox sadədir - erməni silahlı birləşmələri işğal edilmiş torpaqlardan çıxmalıdır, Azərbaycan vətəndaşları öz doğma torpaqlarına qayıtmalıdırlar, ondan sonra regionda sülh və təhlükəsizlik yarana bilər. O ki qaldı xalqların öz müqəddəratını təyin etməsi prinsipinə, bu prinsip ölkələrin ərazi bütövlüyünü pozmamalıdır və Helsinki Yekun Aktında məhz bu ifadələr öz əksini tapır. Bütün münaqişələr ölkələrin ərazi bütövlüyü çərçivəsində öz həllini tapmalıdır”, - dövlət başçısı bildirib. -06D--