Prezident İlham Əliyev Avropa İttifaqı və ABŞ ilə əlaqələrin inkişafından razıdır

Prezident İlham Əliyev son vaxtlar Bakı ilə Avropa İttifaqı və ABŞ arasında əlaqələrin inkişafından razılığını bildirib.

Ötən gün hökumətin  iclasında çıxış edən dövlət başçısı xatırladıb ki, bu ilin birinci rübündə Avropa Komissiyasının yüksək vəzifəli şəxsləri, iki vitse-prezident Azərbaycana gəlib.  “Burada həm energetika, həm siyasi, iqtisadi və digər təhlükəsizlik məsələləri müzakir edilib. Keçən il Avropa Komissiyasının prezidenti Azərbaycana səfər edib. Biz indi yeni əməkdaşlıq formatı üzərində işləyirik”, - o bildirib.

Dövlət başçısı Vaşinqtona nüvə sammitini  dəvətindən məmnun olduğunu qeyd edib.

“Nəzərə alsaq ki, Azərbaycan nüvə dövləti deyil, Azərbaycanda atom elektrik stansiyası yoxdur, demək olar ki, nüvə sənayesi hələ inkişaf etməyib, Azərbaycanın bu mötəbər tədbirə dəvət edilməsi ABŞ hökuməti, prezidenti tərəfindən bizə olan hörmətin təzahürüdür və bizim bu bölgədə oynadığımız rolu əks etdirir. Çünki bu da qeyd edilir ki, Azərbaycan nüvə materiallarının qanunsuz trafikinin qarşısının alınması məsələlərində çox etibarlı tərəfdaşdır”, - İ.Əliyev bildirib.

Onun sözlərinə görə, ABŞ səfəri zamanı ABŞ-ın siyasi rəhbərliyi ilə çox yaxşı, səmərəli və səmimi söhbətləri, danışıqları olub.  “Bu danışıqlar bir daha onu göstərir ki, bizim aramızdakı əlaqələr hər iki tərəf üçün çox önəmlidir. Biz bir çox sahələrdə birgə işləyirik və bu əlaqələr hər iki tərəf üçün yeni imkanlar açır. Burada həm siyasi əlaqələr, həm də energetika sahəsində əməkdaşlıq, təhlükəsizlik məsələləri və ticarət, iqtisadi məsələlər də gündəliyin əsas məsələləridir”, - dövlət başçısı vurğulayıb.-0-