Prokurorluq bazar günü mitinqinin iştirakçılarına xəbərdarlıq edib

Bakı prokurorunun müavini Fazil Həsənəliyev müxalifətin bazar günü mitinqinin təşkilatçılarını qanunazidd hərəkətlərin yolverilməzliyi barədə xəbərdar edib.

Xəbərdarlıq Razim Əmiraslanov və Aydın Əliyevə edilib. Belə ki, oktyabrın 27-də saat 16:00-dan 18:00-dək Yasamal rayonunda “Məhsul” stadionunda mitinqin keçiriləcəyi barədə müraciət onların adından daxil olub.

Prokuror müavini mitinq zamanı “Toplaşma azadlığı haqqında” qanunun tələblərinə əməl olunmasını, ayrı-seçkiliyə,  milli, irqi və dini düşmənçiliyin qızışdırılmasına çağıran şüarların qarşısının alınmasını tövsiyə edib.

F.Həsənəliyev xəbərdarlıq edib ki, ictimai asayiş, vətəndaşların rahatlığı pozularsa, hakimiyyət nümayəndələrinin qanuni tələblərinə tabe olunmasa, müəssisə və nəqliyyatın normal fəaliyyəti pozularsa bu cür hərəkətlərin qarşısı qətiyyətlə alınacaq. 

O xatırladıb ki, bütün bu hallara görə CM-in 169 (toplaşma qaydalarının pozulması), 220 (kütləvi iğtişaşlar), 233 (ictimai asayişin pozulması) maddələri ilə cinayət məsuliyyəti nəzərdə tutulur.

Xatırladaq ki, oktyabrın 12-də mitinq başa çatdıqdan sonra polislə aksiya iştirakçıları arasında ciddi toqquşmalar baş verib. Buna İlham Əliyevin istefasını tələb edən şüarlar səbəb olub. —06D-