Putin Azərbaycan təyyarəsinin məruz qaldığı "faciəvi hadisəyə" görə üzrxahlıq edib

Rusiya Federasiyasının prezidenti Vladimir Putin dekabrın 28-də Azərbaycan prezidenti İlham Əliyevə zəng edib, xəbəri Kremlin mətbuat xidməti yayıb.

Söhbət zamanı dekabrın 25-də AZAL-ın sərnişin təyyarəsinin Aktau şəhəri yaxınlığında qəzaya uğraması ilə bağlı məsələlər müzakirə olunub.

"Vladimir Putin faciəvi hadisənin Rusiyanın hava məkanında baş verməsi ilə əlaqədar üzrxahlıq edib və həlak olanların ailələrinə bir daha dərin başsağlığı verib, xəsarət alanların tezliklə sağalmasını arzulayıb", deyə məlumatda bildirilir.

Söhbət zamanı qeyd edilib ki, cədvələ tam uyğun şəkildə hərəkət edən Azərbaycan sərnişin təyyarəsi dəfələrlə Qroznı hava limanına eniş etməyə çalışıb. Həmin vaxt Qroznı, Mozdok və Vladikavkaza Ukrayna döyüş PUA-ları hücum edirdilər və Rusiya HHM vasitələri bu hücumları rəf edirdilər, deyə press-relizdə qeyd edilir.

Prezident İlham Əliyev “Azərbaycan Hava Yolları”na məxsus sərnişin təyyarəsinin Rusiyasının hava məkanında olan zaman kənar fiziki-texniki müdaxiləyə məruz qaldığını və idarəetməsini tam itirdiyini, Qazaxıstanın Aktau şəhərinə doğru yönləndirildiyini və yalnız pilotların şücaəti və peşəkarlığı sayəsində qəza enişi edə bildiyini qeyd edib.

Rusiyanın İstintaq Komitəsi CM-in 263-cü maddəsi ilə (hava nəqliyyatının hərəkət təhlükəsizliyi və istismar qaydalarının pozulması) cinayət işi açılıb. İstintaq hərəkətləri aparılır, mülki və hərbi mütəxəssislər dindirilir. Azərbaycan Baş Prokurorluğunun iki əməkdaşı Qroznıdadır və RF Baş Prokurorluğunun və İstintaq Komitəsinin əməkdaşları ilə birlikdə işləyirlər.

Öz növbəsində, Azərbaycan prezidentinin mətbuat xidməti bildirib ki, İlham Əliyev ""Azərbaycan Hava Yolları"na məxsus sərnişin təyyarəsinin Rusiyasının hava məkanında olan zaman kənar fiziki-texniki müdaxiləyə məruz qaldığını və idarəetməsini tam itirdiyini, Qazaxıstanın Aktau şəhərinə doğru yönləndirildiyini və yalnız pilotların şücaəti və peşəkarlığı sayəsində qəza enişi edə bildiyini qeyd edib".

Əliyev təyyarənin gövdəsində çoxsaylı dəliklərin olmasının, hələ havada olarkən sərnişin və heyət üzvlərinin təyyarənin göyərtəsini dəlib içəri daxil olan yad hissəciklərlə yaralanmasının və bu xüsusda sağ qalan təyyarə bələdçiləri və sərnişinlərin ifadələrinin kənar fiziki-texniki müdaxilə faktını təsbit etdiyini" vurğulayıb.

Söhbət zamanı dövlət başçıları bu faciənin bütün təfərrüatlarının ciddi və hərtərəfli araşdırılması və günahkarların məsuliyyətə cəlb edilməsini müzakirə ediblər.

Azərbaycan tərəfinin təklifi ilə bu qəzanın səbəblərinin hərtərəfli araşdırılması üçün beynəlxalq ekspertlərdən ibarət heyət təşkil edilib və bu heyət artıq fəaliyyətə başlayıb. 

Dövlət başçıları həmçinin faciə ilə əlaqədar başlanılmış istintaq prosesinin tam şəffaf şəkildə aparılacağını və mütəmadi qaydada ictimaiyyətə məlumat veriləcəyini vurğulayıblar.