Putin Paşinyana başa salıb ki, o, əbəs yerə "İsgəndər"lərin xətrinə dəyib

Bakı/01.03.21/Turan: Ermənistan baş naziri və Rusiya prezidenti telefon söhbəti zamanı Paşinyanın “İsgəndər” raketlərindən istifadə ilə bağlı bəyanatını da müzakirə edib. Bu barədə Ermənistan baş nazirinin mətbuat katibi Mane Qevorqyan “Armenpress”lə söhbətində bildirib.

“Mövcud faktların və məlumatların müqayisəsi nəticəsində Ermənistan baş naziri belə bir nəticəyə gəlib ki, ona yanlış məruzə edilib. Bundan başqa, baş nazirin bəyanatının Ermənistan və Rusiya arasında hərbi əməkdaşlıq və hərbi-sənaye əməkdaşlığı sahəsində müttəfiqlik münasibətlərinin məzmunu və keyfiyyəti ilə heç bir əlaqəsi yoxdur.

Rusiya silahının dünyada ən yaxşı silahlardan biri olduğu da şübhə doğurmur. Ermənistan Respublikası hərbi sənaye və yüksək texnologiyalar sahəsində sıx əməkdaşlığı davam etdirir və gələcəkdə bu əməkdaşlığın dərinləşdirilməsi üzrə addımlar atmaq niyyətindədir”, deyə Paşinyanın mətbuat katibi qeyd edib.

Öz növbəsində, Rusiya prezidentinin mətbuat katibi Dmitri Peskov Yerevanın Ermənistan baş naziri Nikol Paşinyanın “İsgəndər”lərlə bağlı ona yanlış məruzə edildiyi barədə qənaətə gəlməsi haqqında bəyanatlarından Kremlin məmnun olduğunu bildirib.

Xatırladaq ki, fevralın 23-də Paşinyan 1in.am-a müsahibəsində bildirib ki, Qarabağ müharibəsində Ermənistan SQ “İsgəndər” raketlərindən istifadə edib, amma onlar partlamayıb və ya 10% partlayıb. -02D-