Putinin Paşinyanla görüşü

Soçi/14.05.18/Turan: Ermənistan və Rusiyanın strateji əməkdaşlığı müzakirə olunmur. Bu məsələ ilə bağlı konsensus var və heç kim bu münasibətlərin əhəmiyyətini şübhə altına qoymur. Bu barədə Ermənistanın baş naziri Nikol Paşinyan Soçidə Rusiya prezidenti Vladimir Putinlə görüşünün başlanğıcında bildirib.

O, siyasi və iqtisadi sahələrdə iki ölkənin əməkdaşlığına yeni təkan vermək niyyətində olduğunu qeyd edib, həmçinin hərbi-texniki sahədə, habelə digər sahələrdə, o cümlədən turizm sahəsində əməkdaşlığın əhəmiyyətini vurğulayıb.

Paşinyan Moskvanın Ermənistanda daxili siyasi böhranla bağlı mövqeyini müsbət qiymətləndirib, bunun çox "konstruktiv" mövqe olduğunu qeyd edib.

Öz növbəsində, Putin bildirib ki, Rusiya Ermənistanı regionda ən yaxın tərəfdaşı və müttəfiqi hesab edir. "Bu, iqtisadi əməkdaşlığa və təhlükəsizlik məsələlərinə də aiddir", deyə o qeyd edib.

Rusiya Ermənistanın aparıcı ticari-iqtisadi tərəfdaşıdır. Rusiyanın kapital qoyuluşu Ermənistana bütün xarici investisiyaların təxminən 35%-ni təşkil edir. Son zamanlar ölkələr arasında ticarət dövriyyəsinin 25% artması müşahidə olunur.

Putin Paşinyana yeni vəzifəsində uğurlar arzu edib. "Ümid edirəm ki, münasibətlər indiyə qədər olduğu kimi ardıcıl şəkildə inkişaf edəcək, o cümlədən beynəlxlaq əməkdaşlıq xətti üzrə. Xüsusən, Ermənistan və Rusiyanın həmişə bir-birini dəstəklədikləri BMT-də, habelə regional təşkilatlar çərçivəsində", deyə o bildirib. Bundan sonra görüş qapalı qapılar arxasında davam etdirilib. -02D-