Qarabağ Alyansı Azərbaycan və Ermənistan dövlət başçılarının görüşünün mənasız başa çatacağını bildirir

“Qarabağ” Alyansı çərşənbə axşamı BMM-də Qarabağ münaqişəsi ətrafındakı durumla bağlı “Dağlıq Qarabağ: kimi və nəyi gözləyirik?” mövzusunda dəyirmi masa keçirib.

Dəyirmi masada dövlət başçısı İlham Əliyevin Vyanada Ermənistan dövlət başçısı Serj Sarkisyanla görüşü anlaşılmaz adlandırılıb. Alyansa daxil olan ictimai qurumlar Qarabağı azad etmək üçün müharibəni yeganə vasitə sayırlar. Odur ki, danışıqların hansı səviyyədə aparılmasına baxmayaraq? nəticə verəcəyinə inanmadıqlarını ifadə ediblər. Danışıqların müddətsiz deyil, müəyyən vaxta qədər aparılması, bu zaman bitdikdən dərhal sonra hərbi əməliyyatlara başlamaq təklif edilib. 1993-cü ildən bu yana ötən müddət ərzində aparılan danışıqların mənası qalmamasına toxunaraq, bundan sonrakı danışıqların da mənasız olacağına işarə edilib. 

Hərbi xərclər üçün ayrılan 3 milyard manata yaxın büdcə vəsaitlərindən səmərəli istifadə olunmamasına diqqət çəkilib. Bu vəsaitin çox hissəsinin vəzifəli şəxslər tərəfindən mənimsənildiyi, əsgərə ancaq qəpik-quruş çatdığı qeyd edilib. 

Hazırkı şəraitdə Müdafiə Sənayesi Nazirliyinin ölkənin müdafiə qüdrətini artırmalı olması, amma vəzifəsinin öhdəsindən gəlməməsi ifadə edilib. Müdafiə sənayesi naziri Yavər Camalov tənqid atəşinə tutulub. Nazir müdafiə istehkamları tikmək əvəzinə özünə dəbdəbəli malikanələr tikməkdə ittiham olunub.

Natiqlər Azərbaycanla Ermənistan arasında “xalq diplomatiyası”ndan istifadə olunmasına qarşı çıxıblar. Bu layihədə iştirak edənləri Azərbaycana, milli maraqlara xəyanətdə ittiham ediblər.

Müzakirələrin yekunu olaraq qətnamə qəbul edilib. Qətnamədə Ermənistanla danışıqların şərt daxilində aparılması tələb edilir. Ermənistan silahlı qüvvələrinə Azərbaycan ərazilərini boşaltmaq üçün vaxt verilir, bu vaxt ərzində tələbə əməl edilməzsə, müharibə başlaması irəli sürülür. Azərbaycan torpaqları işğalda olduğu, danışıqlar nəticə vermədiyi üçün heç bir beynəlxalq qurumun Azərbaycanı hərbi əməliyyatlara başlamağa görə tənqid etməyə əsası olmamasına diqqət çəkilib. İqtidara ya torpaqları azad etmək, ya da zəifliyi etiraf edərək istefa vermək təklif olunub. Vətəndaş cəmiyyəti institutlarına Ermənistana münasibətdə “xalq diplomatiyası” layihəsinə qoşulmamaq çağırışı edilib.

“Qarabağ Azadlıq” Alyansı 2012-ci ildə təsis edilib. Quruma müharibə tərəfdarları olan Qarabağ Azadlıq Təşkilatı, “Qarabağa Azadlıq” İslami Müqavimət Hərəkatı, müharibə işrirakçıları və veteranları birlikləri daxildir. -05C-