Qarabağda hesablaşmalar bitmək bilmir

Qarabağda erməni qüvvələrinin hazırki komandanı Levon Mnatsakanyan ondan əvvəlki komandan Samvel Babayanı Dağlıq Qarabağa qarşı diversiyada ittiham edib.

Onlar arasında qiyabi və kəskin mübahisə artıq bir neçə gündür davam edir.

Xatırladaq ki, bir müddət əvvəl Samvel Babayan apreldə döyüş əməliyyatları zamanı Ermənistan komandanlığının yol verilmiş səhvlərə görə ərazilərini itirdiyini bildirib.

“Yarım və ya bir saat ərzində bütün mövqelər əldən verilib. Bundan sonra biz hücumlara əl ataraq nəzarəti bərpa etməyə çalışmışıq ki, bu da itkilərə səbəb olub”, deyə Babayan jurnalistlərə bildirib.

Levon Mnatsakanyan ərazilərin itirildiyini inkar etmir, amma Babayana xatırladır ki,  1994-cü ilin yanvar-fevral aylarında Babayanın komandanlığı altında Qarabağın cənubunda 21 km ərazi itirilib.

Babayanın cəbhə xəttində müdafiə qurğularının yaradılmadığı və Qarabağ rəhbərliyinin istefaya getməli olduğu haqqında bəyanatını Mnatsakanyan “Qarabağa qarşı diversiya” adlandırıb.

“Bu çağırışları təhlükəli, keçmişdə belə bir vəzifə tutmuş şəxsə yaraşmayan çağırış hesab edirəm. Onun bu əməllərini cəmiyyətimizə, onun müdafiə qabiliyyətinə qarşı təxribat hesab edirəm”, deyə Mnatsakanyan bildirib.

Separatçıların lideri Bako Saakyan da Babayanın çıxışını tənqid edib, bu cür məsuliyyətsiz hərəkətlərdən qəzəbini dilə gətirib.

Bu arada, Ermənistanda və Qarabağda müşahidəçilər hesab edirlər ki, babayan şüurlu şəkildə vəziyyəti gərginləşdirir, bir qrup yerli hərbiçinin dəstəyi ilə komandan vəzifəsinə qayıtmağa ümid edir. Bütün bunlar hərbi çevriliş və ya Babayanın həbsi ehtimalı yaradır. -02D-