Qarabağın maliyyələşdirilməsi yavaşladı

Bakı/12.08.21/Turan:  Bu ilin birinci yarısında dövlət büdcəsində Qarabağın yenidən qurulması və bərpası üçün nəzərdə tutulmuş vəsaitin cəmi 16,9 faizi xərclənib.

Maliyyə Nazirliyinin məlumatında deyilir ki, Azərbaycan bu il sözügedən məqsədlə 2,2 milyard manat xərcləməyi planlaşdırsa da, yanvar-iyun aylarında 372,1 milyon manat sərf olunub.

Qarabağın yenidən qurulmasına və bərpasına vəsait niyə qənaətlə xərclənir?

Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev Turana bildirib ki, Qarabağla hökümətin siyasəti “yeddi dəfə ölç bir dəfə biç” prinsipinə söykənib. “Həmçinin “Ağıllı şəhər” və “Ağıllı kənd” yalnız layihə deyil. Bu, çox dəqiq detallaşdırılmasını, vizuallaşdırılmasını tələb edir. Biz hər şeyə ehtiyatla yanaşırıq və hətta ən xırda səhvlərini belə buraxmaq istəmirik, hansılar ki, 2000-ci illərindən Azərbaycanda başlamış nəhəng inşaat zamanı buraxılıb”.

Komitə üzvü qeyd edib ki, o vaxt yeni tikilən yollar çökürdü, binaların üzlənməsi qaydalara uyğun aparılmırdı. “Çox şey olurdu. Təzə açılmış və 5 ulduzlu otelə bənzəyən müəssisələr iki-üç ay işləyib bağlanırdı. Bizə isə bu gün qənaətli, gəlir gətirən iqtisadiyyat lazımdır. Bizdə bu gün intensiv inkişaf var. Üstəlik də Qarabağın bərpasında dünyanın ən müasir texnologiyalardan istifadə olunur”.

Quliyevin fikrincə bu məsələdə heç bir tələskənliyə yol vermək lazım deyil. “Fikrimcə ilin axırına kimi bütün bu ayrılmış vəsaitlər xərclənməyəcək. Yalnız infrastrukturun bərpası üçün – yolların tikilməsinə, qaz, su və işıq xəttlərinin çəkilməsinə ayrılmış vəsaitlər xərclənəcək”.

İqtisadçı Natiq Cəfərli isə bldirib ki, Azərbaycanda ayrılmış vəsaitlərin işlədilməsi ilin ikinci yarısına təsadüf etməsi kimi pis ənənə var. “Bu da həm də onunla bağlıdır ki, ilin birinci yarısında sənədləşmə işlərin lənğ aparılır və qanunla əgər büdcədən ayrılmış vəsaitlər xərclənmirsə onlar ilin axırında büdcəyə qaytarılmalıdır. Ona görə də ilin axırında, xüsusən noyabr-dekabr aylarında biz dövlət orqanlarının iri məbləğlərin xərclənməsinə şahidi olacayıq”.

Ekspert deyir ki, bu il büdcədən ayrılmış vəsaitin tam bölgüsü mart ayında başa çatdı. “Vəsaitlərin ayrılması mart ayından sonra başlanıldı və aprel-iyul aylarında işlərin aparılmasına start verildi. Avqust ayından başlayaraq vəsaitlərin daha sürətlə xərclənməsini görəcəyik”.

Cəfərlinin fikrincə burada ən əsas problemlərindən biri şəffaflıq məsələsidir. “Vəsaitlərin hansı layihələrə ayrıldığı, hansı şirkətlər və ya subpodryatçı şirkətlər tərəfindən həyata keçirildiyi aydın deyil”.—0—