![Qərb diplomatları Azərbaycanda həbs olunmuş jurnalistlərə dəstək ifadə ediblər](https://turan.az/resized/news/2023/rsjBBMlPRRX2wBAfzTuN9xfXrqUHiCRRiutF3vae-750-500-resize.webp)
Qərb diplomatları Azərbaycanda həbs olunmuş jurnalistlərə dəstək ifadə ediblər
Bakı/08.12.23/Turan: Dekabrın 7-də Bakıda Avropa İttifaqının Azərbaycan Nümayəndəliyi, Böyük Britaniya, İsveçrə və ABŞ-ın Azərbaycandakı səfirlikləri birlikdə Ümumdünya İnsan Hüquqları gününü qeyd edib.
Avropa İttfaqının Azərbaycandakı Nümayəndəliyinin rəhbəri Peter Mixalko bildirib ki, Ümumdünya İnsan Hüquqları Bəyannaməsi irqindən, cinsindən, dinindən, milliyətindən və hər hansı digər bir mənsubiyyətdən aslı olmayaraq, bütün insanların sahib olduğu əsas hüquq və azadlıqları müəyyən edir.
Jurnalistlərin və fəalların son həbslərinə toxunan Mixalko qeyd edib ki, Azərbaycanda insan hüquqlarının müdafiəsi sahəsində öz səylərini əsirgəməyən, öz həmvətənlərinin mənafeyi uğrunda hər şeyindən keçən görkəmli şəxsiyyətlərə minnatdar olunmalı və tərənnüm edilməlidir.
"Biz İnsan Hüquqları Gününü qeyd etmək üçün bir araya gəldik, lakin, həm də təəssüf edirik ki, bəzi tərəfdaşlarımız və dostlarımız bu tədbirdə bizə qoşula bilmir. Mən xüsusilə bir il əvvəl həbs edilmiş Bəxtiyar Hacıyevi, habelə Qubad İbadoğlu, Ülvi Həsənli, Sevinc Vaqifqızı, Məhəmməd Kekalov, Nərgiz Absalamova, Əziz Orucov, Rüfərt Muradlı və həbsdə olan digər vətəndaş fəallarını, hüquq müdafiəçilərini nəzərdə tuturam", deyə o qeyd edib.
ABŞ-ın Azərbaycandakı səfirliyinin müvəqqəti işlər vəkili Huqo Gevara tədbirdə çıxış edərək, Ümumdünya İnsan Hüquqları Bəyannaməsinin təşəbbüskarı kimi ABŞ-ın dünyada insan haqlarını dəstəkləmək üçün xüsusi məsuliyyət daşıdığını bildirib.
Azərbaycanda ABŞ hər bir kəsin hüquqları qorunan və onlara hörmətlə yanaşılan demokratik, plüralist və inkluziv cəmiyyətin inkişafını dəstəkləmək üçün hökümət, vətəndaş cəmiyyəti və beynəlxalq tərəfdaşlarla sıx əməkdaşlıq edir.
"Biz qanunun aliliyini, məhkəmə sisteminin müstəqilliyini, ifadə və sərbəst toplaşma azadlığını, qadınların və azlıqların iştirakını, dövlət qurumlarının hesabatlığını gücləndirmək üçün çalışırıq", deyə Huqo Gevara bildirib.
ABŞ Azərbaycan vətəndaş cəmiyyətinin bir neçə üzvünün, o cümlədən Qubad İbadoğlunun, jurnalistlər Ülvi Həsənli, Sevinc Vaqifqızı, Nərgiz Absalamova, Əziz Orucovun, o cümlədən vətəndaş cəmiyyəti fəalları Bəxtiyar Hacıyevin, Məhəmməd Kekalovun həbsindən və ittiham olunmasından dərin narahatdır.
"Biz Azərbaycan höükmətini Azərbaycan Konstitusiyasına, mətbuat və söz azadlığına dair beynəlxalq öhdəliklərinə sadiqliyinin hissəsi kimi adı çəkilən şəxslərin hüquqlarını qorumağa çağırırıq.
Azərbaycanda və bütün dünyada insan haqlarına və fundamental azadlıqlara hörmət təşviq etmək istiqamətində yorulmadan çalışan bütün hüquq müdafiəçilərinin, jurnalistlərin, vətəndaş cəmiyyəti üzvlərinin cəsarətini və fədakarlığını alqışlamaq istəyirəm", deyə o bildirib.
Böyük Britaniyanın Azərbaycandakı səfiri Fergus Auld tədbirdə çıxış edərək qeyd edib ki, Böyük Britaniya üçün dünyanın bütün nöqtələrində insan hüquqlarının müdafiəsi vacibdir.
"Biz Azərbaycanda müntəzəm olaraq hökumətlə müxtəlif fərdi və ümumi insan hüquqları məsələlərini müzakirə edirik. İnsan hüquqları ilə bağlı mesajlarımızı həm qapalı görüşlər, həm də ictimai çağırışlar vasitəsilə çatdırırıq.
Avropa üzrə nazirimiz Leo Dokerti iki həftə əvvəl Azərbaycanda olarkən biz hüquq müdafiəçiləri ilə görüşdük, Qubad İbadoğlunun saxlanması və "Abzas Media" rəhbərlərinin yenicə baş verən həbslərini müzakirə etdik.
London Azərbaycan hökumətini istintaq proseslərini təkmilləşdirməyə; diffamasiya ilə bağlı zəruri dəyişikliklər etməyə və məişət zorakılığının bütün formalarını kriminallaşdırmaq üçün zəruri addımlar atmağa çağırır", deyə o bildirib.
İsveçrə səfiri Tomas Şatli hər bir fərdə hörmətlə yanaşılan və onun əsas hüquqlarının təmin olunduğu bir cəmiyyət uğrunda səy göstərməyə çağırış edib.
"Anlaşma, tolerantlıq və açıq dialoqu inkişaf etdirməklə, biz İsveçrədə, Azərbaycanda – bütün dünyada daha yaxşı cəmiyyət üçün səy göstərməliyik", deyə Şatli bildirib. 16B
Rəy yaz