!["Tərtər işinin" bütün fiqurantları azad edilməlidir - hüquq müdafiəçiləri](https://turan.az/resized/news/2023/hdgbkc4xiO23vo3tAtPDxlFbjc7XrwkB5VstErBI-750-500-resize.webp)
"Tərtər işinin" bütün fiqurantları azad edilməlidir - hüquq müdafiəçiləri
"Tərtər işinin" bütün fiqurantları azad edilməlidir - hüquq müdafiəçiləri
Bakı/08.12.23/Turan: "Tərtər işi" üzrə həbs edilmiş, hələ də həbsdə qalan 10 hərbiçinin təqsirsiz olması şübhə doğurmur. Bu barədə bu gün "İşgəncələr Əleyhinə Araşdırma Mərkəzi"nin ofisində keçirilən mətbuat konfransında bildirilib.
Bakı İnsan Hüquqları Klubunun rəhbəri Rəsul Cəfərov bildirib ki, bu şəxslər dövlətə xəyanət ittihamı ilə həbs edilib. Bu iş üzrə həbs edilən digər şəxslər kimi, onlar da fiziki və mənəvi işgəncələrə məruz qalıb.
"Onların bəzilərinin işlərində ümumiyyətlə heç bir dəlil yoxdur", deyə Cəfərov bildirib.
Belə ki, Beyləqan korpusundan 20 il müddətinə azadlıqdan məhrum edilmiş Lətif Lətifovun işində xidmət yoldaşını öldürmə ittihamı da var. Lakin xidmət yoldaşı Ermənistan tərəfdən açılan atəş nəticəsində ölüb və ona şəhid statusu verilib.
Lətifovun qardaşı bildirib ki, dekabrın 4-də o, azad edilməsi tələbi ilə Qobustan həbsxanasında aclıq aksiyasına başlayıb.
Kəşfiyyatda xidmət edən İsmayıl Hüseynov 2016-cı ildə "ermənilərə işləməkdə" şübhəli bilinib. Lakin Hərbi Prokurorluğun araşdırması şübhələri təsdiq etməyib və iş bağlanıb. Amma bir il sonra iş bərpa edilib və işgəncə altında alınan yalan ifadələr əsasında Hüseynov mühakimə edilib.
Zamiq Əlimanovun atası bildirib ki, oğlu orduda xidmətinin 21-ci günündə həbs edilib. "Oğlum Naxçıvanski adına məktəbi bitirib və xidmətinin 21-ci günündə dövlətə xəyanət ittihamı ilə həbs olunub. O, nə vaxt "dövlətə xəyanət" etdi? Yoxsa məktəbdə "dövlət xainləri" yetişdirirlər?", deyə Zahid Əlimanov bildirib.
"İşgəncələr Əleyhinə Araşdırma Mərkəzi"nin rəhbəri Fikrət Cəfərli bildirib ki, "Tərtər işi" üzrə həbs olunan şəxslərin cinayət işləri sürətçıxarma vasitəsilə yazılıb, bu da obyektiv istintaq aparılmadığını düşünmək üçün əsas verir.
"Artıq 50 nəfərə yaxın şəxs bəraət alıb, lakin işləri saxtalaşdıran bir müstəntiq belə cəzalandırılmayıb", deyə Cəfərov bildirib.
"İşgəncələr Əleyhinə Araşdırma Mərkəzi"nə hələ 2006-cı ildən "dövlətə xəyanətə" görə həbs edilmiş hərbiçilər müraciət edir. "Onlar işgəncəyə məruz qaldıqlarını, özlərinə və başqa şəxslərə böhtan atmağa məcbur edildiklərini bildirirlər", deyə hüquq müdafiəçisi qeyd edib.
Hüquq müdafiəçiləri hüquq-mühafizə orqanlarını 10 şəxsin işinə yenidən baxmağa çağırıblar.
"Yeni istintaq müddətində bu şəxslər həbsdən azad edilməlidir. Qanunvericilikdə buna icazə verilir. Onlar prezident tərəfindən əfv oluna bilər, başqa mexanizmlər də var", deyə Cəfərov bildirib.
Həbs edilənlərin valideynləri və qohumları KİV vasitəsilə işə müdaxilə etmək və təqsirsiz şəxslərin azad edilməsini təmin etmək xahişi ilə Azərbaycan prezidenti İlham Əliyevə və birinci vitse-prezident Mehriban Əliyevaya müraciət ediblər.
Bu 10 nəfər 11 ildən ömürlük həbsə qədər cəzalara məhkum ediliblər.
Bir qrupda Qasımov Elşən Qasım oğlu, Lətifov Lətif Ziyad oğlu, Heydərov Daşqın Musa oğlu, Əlimanov Zamiq Zahid oğlu, Cavadov Ruslan Mirağali oğlu, digər qrupda Abbasquliyev Cavad Vahid oğlu və Əmrahov Ziya Rafiq oğlu mühakimə edilib. Əliyev Alim Akif oğlu, Hüseynov İsmayıl İntiqam oğlu və Oqtaylı Oqtay Araz oğlu tək-tək mühakimə ediliblər.
Mətbuat konfransında həmçinin işgəncələrdə əli olan bütün yüksək vəzifəli hərbiçilərin cəzalandırılması tələbi səslənib.
Hüquq müdafiəçilərinin məlumatına görə, qurbanların ifadələrində ən çox keçmiş korpus komandiri Hikmət Həsənovun adı keçir. 06В
-
- Dünyada
- 8 Dekabr 2023 16:17
Siyasət
-
Ermənistan ATƏT-in Minsk Qrupunun buraxılmasının əleyhinə deyil, amma indi bu məsələni müzakirə etməyi məqsədəuyğun hesab etmir.
-
Ermənistanın baş naziri Azərbaycan prezidenti İlham Əliyevlə iki ölkənin sərhədində görüşməyə hazırdır. "İlham Əliyevlə görüş Ermənistan-Azərbaycan sərhədində də ola bilər. Mən belə formata hazıram",- Paşinyan bugünkü mətbuat konfransında deyib.
-
Avqustun 31-də Azərbaycanda birpalatalı parlamentə - Milli Məclisə növbədənkənar seçkilər ərəfəsində "sükut günü"dür. Səsvermədən 24 saat əvvəl hər hansı seçkiqabağı təşviqat qadağandır.
-
Avqustun 30-da saat 22:55-ə yaxın Ermənistanın Metsamordakı Atom Elektrik Stansiyası ölkənin enerji sistemindən ayrılıb. Bu barədə Ermənistanın Ərazi İdarəetmə və İnfrastruktur Nazirliyi bildirib. Buna ildırım zərbəsi səbəb olub, nəticədə stansiyanın təhlükəsizlik sistemi stansiyanı təhlükəsiz dayanma rejiminə keçirib. Hazırda stansiyanın kollektivi onun yenidən işə salınması ilə məşğuldur.
Rəy yaz