Qərb PR-agentlikləri Azərbaycanın imicinin yaxşılaşdırılması ilə məşğuldur

Azərbaycan hakimiyyəti xaricdə dövlətin imicinin yaxşılaşdırılması üçün tədbirlər görür və bu işə qərb PR-agentlikləri cəlb olunur. 

“Sərhədsiz reportyorlar” beynəlxalq mətbuatı müdafiə təşkilatının  qiymətləndirməsinə görə, Azərbaycan hakimiyyəti əvvəlkitək tənqidi əhval-ruhiyyəli jurnalistlərlə sərt davranır. Uydurma ittihamlar irəli sürülməklə onlar həbs olunur, məhkəmələrə verilir. Eyni zamanda da hökumət müasir və açıq ölkə imicinin yaradılmasına böyük məbləğlər sərf edir.

Əsasən hakimiyyət Almaniyada öz imicinin yaxşılaşdırılması üçün səylər göstərir. Belə ki,      

“Eurovision” mahnı müsabiqəsi dövründə KİV Azərbaycanda insan hüquqlarının və mətbuat azadlığının pozulması barədə məlumatlar yayıb. Bu vəzifə ilə digərləri ilə yanaşı Berlinin Consultum  Communications PR-agentliyi məşğul olur. Bu barədə “Sərhədsiz reportyorlar”ın bəyanatında deyilir. 

“Eurovision” mahnı müsabiqəsindən 100 gün sonra Azərbaycanda baş verənlərə beynəlxalq maraq xeyli azalıb. Eyni zamanda tədbir başa çatdıqdan beş gün sonra ölkə prezidentinin müşavirlərindən biri Əli Həsənov ictimaiyyəti insan haqlarının pozulması barədə xarici KİV-ə məlumat verənlərə nifrət bildirilməsinə çağırıb.

İyunun ortalarından fəaliyyətdə olan yeni qanunvericilik normaları Azərbaycanda mətbuat azadlığını xeyli məhdudlaşdırır. Bu normalar Azərbaycan firmalarına öz sahibləri və səhmdarları barədə informasiyanı gizlətməyə imkan verir, dövlət başçısının və onun xanımının cinayət məsuliyyətindən ömürlük immunitetini təmin edir.  

Qanunvericiliyə dəyişikliklər jurnalist Xədicə İsmayılovanın yüksək vəzifəli dövlət məmurları arasında korrupsiya faktlarını və prezident ailəsinin biznesi haqda məlumatları açıqlamasından sonra edilib.

“Sərhədsiz reportyorlar” qərb siyasətçilərini Azərbaycandan insan haqları sahəsində beynəlxalq öhdəliklərə əməl etməsini tələb etməyə çağırıb.  

“İnsan hüquqları və mətbuat azadlığı kimi məsələlər iqtisadi maraqlara qurban verilməməlidir. Jurnalistlərin siyasət, PR-agentliklər və lobbiçilər arasında əlaqələrini açmaq imkanları olmalıdır, onlar öz işlərində siyasi təzyiqə boyun əyməməlidir”, - hüquq müdafiəçiləri bildiriblər. -02D-