Qubad İbadoğlunun azad edilməsinə beynəlxalq reaksiya

Qərb strukturlarının nümayəndələri siyasətçi və iqtisadçı Qubad İbadoğlunun azad edilməsini alqışlayıblar, onun üzərindən bütün ittihamların götürülməsinə və digər siyasi məhbusların  azad edilməsinə çağırıblar.

"Böyük Britaniya doktor Qubad İbadoğlunun ev dustaqlığına buraxılması barədə məhkəmə qərarını alqışlayır. Biz onun ixtisaslı mütəxəssislər tərəfindən tibbi yardım və müalicə almaq hüququnu uzun müddət müdafiə etmişik", - Böyük Britaniyanın Azərbaycandakı səfiri Fergus Old (Fergus Auld) X sosial platformasında bildirib.

Avropa Şurası Parlament Assambleyasının "Azərbaycanda jurnalistlərin və hüquq müdafiəçilərinin həyatına və təhlükəsizliyinə təhdid" mövzusunda məruzəçisi Hanna Bardel İbadoğlunun həbsdən azad edilməsini alqışlayıb.

Bardel öz bəyanatında Azərbaycan hakimiyyətini təcili olaraq siyasi motivli ittihamları yenidən nəzərdən keçirməyə və onları İbadoğlunun üzərindən götürməyə çağırıb.

Avropa Şurası Parlament Assambleyasının digər üzvü, almaniyalı millət vəkili Frank Şvabe də İbadoğlunun azad edilməsindən məmnun qalıb.

"Bu, ümidverici faktdır, amma aydındır ki, ona qarşı bütün ittihamlar ləğv edilməlidir. 300 siyasi məhbusun hamısı azad edilməlidir", - Şvabe X sosial şəbəkəsində yazıb.

"Qubad İbadoğlunun barəsində qətimkan tədbirinin dəyişdiyini görmək çox xoşdur", - Human Rights Watch təşkilatının Avropa və Mərkəzi Asiya Departamentinin rəhbəri Giorgi Qoqia bildirib.

"Lakin o həbs olunmamalıydı! Bakı ona qarşı bütün ittihamları ləğv etməlidir", - Qoqiya belə hesab edir.