Qubad İbadoğlunun son tibbi müayinəsi səhhətinin pisləşdiyini təsdiqləyib

Ötən həftənin sonu iqtisadçı Qubad İbadoğlu sinə və kürək nahiyəsində anidən ağrıların artması və səhhətindəki digər problemlər səbəbindən kardioloqa müraciət edib. Bu barədə onun qardaşı Qalib Bayramov bildirib.

“Qardaşım aortanın anevrizması xəstəliyindən əziyyət çəkir, təcili cərrahi müdaxilə tələb olunsa da, ölkədən çıxışına qadağa qoyulduğundan hazırda əməliyyat etdirməsi mümkün deyil”, -  Bayramov deyib.

Son ekokardioqramma və qan analizləri  mövcud problemlərin kəskinləşdiyini və yeni problemlərin yarandığını göstərib.

“Ekokardioramma son 6 ayda aorta damarının diametrinin daha 2 millimetr artdığını göstərib. Bu, tibbdə sürətli artım hesab olunur və cərrahi müayinə və müdaxilə ehtiyacını artırır.

Qan analizlərində qan azlığı əlamətləri ilə müşahidə edilib, qanda hemoqlobin səviyyəsinin normadan aşağı olmasını aşkara çıxarıb, qanın oksigeni daşıma qabiliyyətini xarakterizə edən göstəricilər pisləşib”, - o qeyd edib.

Bundan əlavə, qan analizlərində qan azlığı əlamətləri  müşahidə edilib, qanda hemoqlobin səviyyəsinin normadan aşağı olmasını aşkara çıxarıb, qanın oksigeni daşıma qabiliyyətini xarakterizə edən göstəricilər pisləşib

İbadoğlu özü deyib ki, ağırlıaşmanın nəticəsi olaraq halsızlıq, yorğunluq, əzginlik, bəzən başgicəllənməyə məruz qalır. “Həkimlər bütün bunları da ürəkdəki mövcud problemə qarşı qəbul etdiyim dərmanların yanaşı effektləri ilə əlaqələndirirlər. Odur ki, yeni müalicə kursuna başlamışam. Amma həkimlərin rəyinə görə, bu müalicə xəstəliyin səbəbinə deyil, onun nəticələrinin tənzimlənməsinə yönəlib. Xəstəliyin səbəbi cərrahiyə ehtimalı artan ürəkdə aorta damarının genişlənməsidir. Bundan əlavə, son zamanlar kürək ağrıları, bel nahiyəsində protuziya, yırtıq və sinir qıcıqlanmasından qaynaqlanan kəskin ağrılar normal hərəkətimi çətinləşdirib”, - o deyib

Onun sözlərinə görə, xaricdə cərrahi əməliyyat olunması üçün ölkədən buraxılmır.  “Xaricdə müayinə, müalicə və əməliyyat üçün tibbi məqsədlərlə ölkədən qısa müddətli çıxış üçün vəkillərim iki dəfə Nərimanov Rayon Məhkəməsinə müraciət ediblər. Lakin məhkəmə vəsatəti qəbul etməyib. Nərimanov Rayon Məhkəməsinin hər iki imtina qərarından apellyasiya şikayəti verilsə də təmin olunmayıb”, - İbadoğlu bildirib.

* Xatırladaq ki, tanınmış iqtisadçı Qubad İbadoğlu saxta valyuta hazırlamaqda ittiham olunub və ötən il iyulun 23-də həbs edilib.

Yerli və beynəlxalq təşkilatların çoxsaylı çağırışlarından sonra bu il aprelin 22-də İbadoğlunun həbsi ev dustaqlığı ilə əvəz olunub.

Qubad İbadoğlu ona qarşı irəli sürülən ittihamları rədd edir və həbsinin siyasi sifariş olduğunu bildirir.