Readmissiya olunan Azərbaycan vətəndaşlarının reinteqrasiyası

Avropa İttıfaqı (Aİ) və Azərbaycan arasında imzalanmış “Mobillik Naminə Tərəfdaşlıq” çərçivəsində həyata keçirilən və Aİ tərəfindən maliyyələşdirilən “Azərbaycanla mobillik maminə tərəfdaşlığın həyata keçirilməsinə dəstək” (MOBILAZE) layihəsində məqsəd nizamlı miqrasiya idarəçiliyini gücləndirmək üçün iştirakçı ölkələr arasında birbaşa mübadilədən ötrü  möhkəm zəmin və real imkanlar yaratmaqdır.  

MOBILAZE layihəsində ümumi məqsəd miqrasiya sahəsində dövlət siyasətinin hazırlanması və həyata keçirilməsi üçün Azərbaycan hökumətinin potensialının artırılmasına xüsusi diqqət yetirməklə “Mobillik Naminə Tərəfdaşlıq”ın icrasını dəstəkləməkdir. Layihənin xüsusi məqsədləri Azərbaycan hökumətinin miqrasiya sahəsindəki monitorinq, təhlil və proqnozlaşdırma potensialının artırılması, əmək miqrasiyası, sənədlərin təhlükəsizliyi, milli sığınacaq siyasəti sahəsində və geri qayıdan Azərbaycan vətəndaşlarının davamlı reinteqrasiyasının həyata keçirilməsində idarəçiliyi və potensialı gücləndirmək, o cümlədən Aİ və Azərbaycan arasında mobilliyə dair ictimai məlumatlılığı artırmaqdır.

Azərbaycanın dövlət qurumları, əlaqədar tərəflər, Avropa İttıfaqının nümayəndəliyi, Bolqarıstan, Niderland və Maastrixt Universitetindən beynəlxalq ekspertlər və Miqrasiya Siyasətinin İnkişafı üzrə Beynəlxalq Mərkəz (ICMPD) 2016-cı il noyabrın 16-da MOBILAZE layihəsinin qayıdış və reintegrasiya üzrə 5-ci komponenti çərçivəsində toplanacaqlar. Tədbirdə məqsəd Azərbaycan Respublikasına geri qaytarılmış ölkə vətəndaşlarının ehtiyaclarını və onların cəmiyyətə mümkün reinteqrasiya imkanlarını ətraflı təhlil etmək üçün fokus qrup müzakirəsi təşkil etməkdir. Fokus qrup müzakirəsi Hyatt Regency Baku otelinin Əmirov zalında saat 09:30-da başlayacaq.

Kütləvi informasiya vasitələrinin nümayəndələri tədbirin açılış hissəsinə (Azərbaycan/ingilis dillərində tərcümə təmin olunacaq) dəvət olunur. İlkin proqram və layihə barədə qısa məlumat əlavə olunur. -0-