ReAl yenidən qurultay keçirmək üçün yer istəyib

Bakı/11.11.17/Turan: "Respublikaçı Alternativ" (ReAl) Hərəkatı eyniadlı partiyanın təsis qurultayının keçirilməsi üçün yer verilməsi xahişi ilə Bakı şəhər İcra Hakimiyyətinə müraciət edib. Müraciət qurultayın keçirilməsi üzrə təşəbbüs qrupu adından göndərilib.

Hərəkat təklif olunan təqvim günlərindən birində - 18, 19, 25, 26 noyabr və ya 2, 3 dekabr tarixlərində 400 nəfərlik zal verməyi xahiş edir.

Bundan əvvəl ReAl artıq iki dəfə qurultay keçirilməsi üçün yer ayrılması xahişilə müraciət edib, amma şəhər hakimiyyəti rədd cavabı verib.

Mehmanxana-iş mərkəzləri konfrans zallarını ReAl-a verməkdən imtina edir.

* ReAl 2009-cu ildə yaranıb və bir şəxsin ölkə prezidenti vəzifəsində iki müddətdən artıq qalmasına etiraz edib. Hərəkatın lideri İlqar Məmmədov 2013-cü ilin yanvarında İsmayıllı rayonunda iğtişaşların təşkili haqqında uydurma ittihamlarla həbs edilib və 7 il müddətinə azadlıqdan məhrum edilib.

Amma Avropa İnsan Hüquqları Məhkəməsi onun həbsinin qanunsuz və siyasi motivli olduğunu hesab edib və onun dərhal azad edilməsi haqqında qərar verib. Strasburq Məhkəməsinin bu qərarı 2014-cü ilin mayında qəbul edilib, amma bu günə qədər icra olunmayıb. -05B06-