Rəsmi Bakı Vaşinqtonda gözlənilən görüş barədə

Bakı/15.06.19/Turan: Ermənistan özü belə bir mif yayır ki, guya Azərbaycan və Dağlıq Qarabağ arasında münaqişə mövcuddur. Ermənistanın müdafiə nazirinin hərəkətləri bu ölkənin təcavüzkar siyasətini növbəti dəfə təsdiq edir. Məhz buna görə də Ermənistan-Azərbaycan Dağlıq Qarabağ münaqişəsinin həlli üzrə danışıqlar işğalçı Ermənistanla əraziləri işğal olunan Azərbaycan arasında aparılır. Bu barədə Azərbaycan XİN-in rəsmi nümayəndəsi Leyla Abdullayeva rəsmi Yerevanın son bəyanatları və Ermənistan müdafiə nazirinin azərbaycanlı hərbçini öldürənləri mükafatlandırması fonunda iyunun 20-də Vaşinqtonda iki ölkə XİN rəhbərinin gözlənilən görüşünü şərh edərkən bildirib.

"Danışıqların mövzusuna gəldikdə, hər zaman qeyd etmişik və bir daha təkrar etmək istərdik ki, Azərbaycanın işğal olunmuş ərazilərinin işğalçı qüvvələrdən boşaldılması və azərbaycanlı məcburi köçkünlərin öz evlərinə geri qayıtması müzakirələrin əsas mahiyyətini təşkil edir", - o qeyd edib.

"Ümid edirik ki, Moskva görüşünün davamı olaraq Vaşınqton görüşündə tərəflər daha konkret nəticələr əldə edəcəklər. Həmçinin fikrimizcə, Ermənistan rəhbərliyinin mövqeyindəki qeyri-müəyyənliyə son qoyulmalıdır. Yalnız aydın mövqe, qətiyyət və siyasi iradə münaqişənin sülh yolu ilə həllinə töhfə verə bilər, - XİN nümayəndəsi vurğulayıb. -06D-