Rəsmi Bakının Transxəzər qaz kəmərilə bağlı mövqeyi

Azərbaycanla Türkmənistan Transxəzər qaz kəmərinin tikintisi barədə qərarı öz suveren hüquqları çərçivəsində qəbul etməlidir. Bu barədə Azərbaycanın xarici işlər nazirinin müavini Xələf Xələfov bu gün İstanbulda Beynəlxalq Xəzər Forumunda bildirib.

O qeyd edib ki, son illər ümummilli lider Heydər Əliyevin neft strategiyasının uğurla reallaşması sayəsində Azərbaycan qaz ixracatçısına çevrilib. Transanadolu qaz kəmərinin Türkiyə ərazisi ilə çəkilməsi məhz Avropaya qaz ixracına xidmət edir.

“Bu mənada Transxəzər qaz kəməri xüsusi aktuallıq kəsb edir. Bu layihə ətrafında onun tərəfdarları və əleyhdarları arasında qızğın mübahisələr gedir. Lakin Transxəzər qaz kəməri məsələsi Azərbaycan və Türkmənistanın suveren hüquqları  çərçivəsində həll olunmalıdır, beynəlxalq hüquq normaları da buna yol verir. Biz layihənin  canlanmasına öz töhfəmizi verməyə hazırıq”, - X.Xələfov vurğulayıb.

Xəzər dənizinin hüquqi statusu üzrə danışıqlara gəlincə, o qeyd edib ki, son illər Xəzəryanı ölkələrin bu məsələyə dair mövqeyində mühüm irəliləyişlər müşahidə olunur, mövqelərin yaxınlaşdırılması ilə bağlı addımlar atılıb.

“Azərbaycan, Qazaxıstan və Rusiya Xəzər dənizinin dibinin bölünməsi üzrə sazişə nail olublar. Ümid edirik ki, İran və Türkmənistanla da beynəlxalq hüquq və təcrübə çərçivəsində dibin bölünməsi üzrə saziş əldə olunacaq”, - nazir müavini vurğulayıb.

* Transxəzər qaz kəməri layihəsi Türkmənistan qazının Avropaya nəqli üçün Xəzər dənizinin dibi ilə Türkmənistandan Azərbaycana boru kəmərinin çəkilməsini nəzərdə tutur. Avropa İttifaqı və ABŞ layihəni fəal şəkildə dəstəkləyir. --12D—