ARDNŞ-nin "törəməsi" İsraildə kəşfiyyat qazmasına başlayıb

İsrailin dəniz şelfində “Şemen” strukturunun işlənməsi layihəsinin operatoru olan Azərbaycanın Caspian Drilling Company Ltd (CDC) şirkəti ilk kəşfiyyat quyusunu qazmağa başlayıb, deyə bu gün CDC-in baş direktoru Fərid Axundov Trend-ə bildirib. 

CDC layihəsi çərçivəsində İsrailin ACC Holdings International və B"H Shemen Oil and Gas Exploration "2010" Ltd (ACC Group) ötən il əsas prinsiplər üzrə saziş, bir ay əvvəl operatorluq üzrə saziş imzalayıblar. Bu, CDC-ə işə başlamaq imkanı verib. 

"Prosesə başladıq, qazma yerində Atwood Oceanics qazma kontraktorunun qurğusu durur, artıq deyə bilərik ki, qazma işlərinin birinci mərhələsinə başlamışıq, yəni 72 metr dərinliyə çatmışıq", - deyib Axundov. 

Onun sözlərinə görə, hazırda qazma işinə hazırlıq işləri gedir. 

Axundov bildirib ki, 28 düymülk bölmənin ilk qazma mərhələsi 9 dekabrda başa çatacaq, sonra qazma işləri davam edəcək. 

“Şemen” strukturu iki blokdan ibarətdir. Birinci kəşfiyyat quyusunun qazılması (layihə dərinliyi 5 800 metr) 6 aya başa çatmalıdır. Bundan sonra ikinci quyunun qazılmasına başlanılacaq. 

Strukturda kəşfiyyat quyusu qazılandan sonra, bəlkə, bir qiymətləndirmə quyusu qazmaq zərurəti yarandı. Bu, stasionar platformanın qurulacağı yeri müəyyən etməyə imkan verəcək. Axundov bildirib ki, kəşfiyyat quyuları elə layihələndirilib ki, yaxşı nəticələr əldə edilsə, onlardan istismar quyusu kimi istifadə etmək olar. 

Axundovun sözlərinə görə, CDC tərəfdaşları ilə "Оз" İsrail dəniz perspektiv strukturunda işləmək üçün lisenziyaya malikdir. Əvvəllər burada 3 aylıq seysmik tədqiqat aparılıb. Hazırda nəticələr şərh edilir və iş gələn yanvarda başa çatacaq. 

CDC məlumatlar əsasında tərəfdaşları ilə bu strukturda kəşfiyyat işlərinin məqsədəuyğunluğunu müəyyən edəcək. 

ARDNŞ-nin 92,44% paya malik olduğu CDC Azərbaycanda bütün dəniz PSA-sazişlərdə iştirak edib və edir. O cümlədən, “Şahdəniz”in kəşfində iştirak edib. Burada şirkət əsas podratçı olub. Şirkət dəniz yataqlarında qazma işlərində böyük təcrübəyə malikdir. “Azəri-Çıraq-Günəşli” və  “Şahdəniz” yataqlarında qazma işlərində fəal iştirak edir. --0—