RF Ədliyyə Nazirliyi Baş Prokurorluğa Anar Allahverənovun işini araşdırmağı tapşırıb

Bakı/14.11.17/Turan: Rusiya Ədliyyə Nazirliyi RF Baş Prokurorluğuna Anar Allahverənovun işilə bağlı təhqiqat aparmaq və bu haqda Dünya Azrərbaycanlıları Assambleyasını məlumatlandırmaqla bağlı müraciət edib.

Almaniyada yerləşən Dünya Azərbaycanlıları Assambleyası (DAA) rusiyalı idmançı Andrey Draçevin ölümündə günahlandırılan Anar Allahverənovun işinin obyektiv araşdırılması xahişilə bu il oktyabrın ortalarında Rusiya hakimiyyətinə müraciət edib.

"Hüquq-mühafizə orqanları Anar Allahverənova qarşı cinayət işi qaldırıblar. İşin yalnış istiqamətə yönləndirilməsi və cinayətin milli zəmində təqdim edilməsi, Anar Allahverənovun ömürlük məhkum olunması cəhdləri müşahidə edilir", - DAA-nın baş prokuror, ədliyyə naziri, FTX rəhbəri, RF İstintaq Komitəsinin rəisi, ombudsman, Prezident Administrasiyası və RF Dövlət Dumasına müraciətində deyilir.

Müraciət müəllifləri təəssüflə qeyd edirlər ki, Rusiya vətəndaşı olan azərbaycanlı Anar Allahverənovla Andrey Draçev arasındakı "təmiz məişət mübahisəsi" davaya çevrilib və nəticədə sonuncu ölüb.

Müraciət müəllifləri "istedadlı və perspektivli idmançı"nın ölümündən təəssüflənir və onun ailəsinə, yaxınlarına başsağlığı verirlər.

Rusiya və Azərbaycan sıx əməkdaşlıq edən dost ölkələrdir. Rusiyada milyonlarla azərbaycanlı rusiyalılarla dostluq və sülh şəraitində yaşayır, həmçinin Azərbaycanda on minlərlə rus heç bir diskriminasiyaya məruz qalmadan dost atmosferində yaşayır.

Müttəhim A.Allahverənov RF CM-in 111 (4) maddəsilə (sağlamlığa ciddi zərər vurmaq ehtiyatsızlıqdan ölümə səbəb olduqda) təqsirli bilinsə də sonradan bu insidentə millətlərarası xarakter verilib. Odur ki, müraciətdə A.Allahverənovun işinin şəxsi nəzarətə götürülməsi və buna milli, etnik don geyindirilməsinə yol verilməməsi xahiş olunur.

*Avqustun 20-də Xabarovskda pauerliftinq üzrə Dünya və Avropa çempionu Andrey Draçevlə şərq döyüşü ilə məşğul olan Anar Allahverənov arasında baş verən dava Draçevin ölümü ilə nəticələnib.

Sentyabrın 14-də A.Allahverənov polisə təslim olub.

Əvvəlcə cinayət işi "sağlamlığa qəsdən ağır zərər vurmaq ehtiyatsızlıqdan zərərçəkənin ölümünə səbəb olduqda" maddəsilə qaldırılıb. Sonradan RF İstintaq Komitəsi işi xuliqanlıq zəminində törədilən qətl maddəsinə tövsif edib.-06D--