RF XİN başçısı Qarabağ üzrə birtərəfli addımlarla bağlı ittihamları təkzib edir

Moskva/19.11.20/Turan: 9 noyabr tarixli sazişin imzalanmasından əvvəl son bir ay ərzində ATƏT-in Minsk Qrupunun hər üç həmsədrinin – Rusiya, ABŞ və Fransanın mövqeyi dəfələrlə həmsədr ölkələrin prezidentləri, nazirləri, xüsusi nümayəndələri səviyyəsində ifadə edilib. Bu mövqe qan axıdılmasına dərhal son qoyulmasından və atəşkəsə nəzarət mexanizminin işlənib hazırlanmasından ibarət idi. Bu barədə noyabrın 19-da RF XİN başçısı Sergey Lavrov Rusiya televiziyasının xahişi ilə ABŞ və Fransanın Qarabağda atəşkəs haqqında 9 noyabr tarixli üçtərəfli sazişlə bağlı narazılığının səbəbini şərh edərkən bildirib.

“Son günlər mənim amerikalı və fransalı həmkarlarımla söhbətlərimdə, eyni zamanda Prezident E.Makronun Prezident Putinlə Dağlıq Qarabağ mövzusu ilə bağlı söhbətlərində açıq-aşkar sındırılmış mənlik hissi sezilir. Bu, acınacaqlıdır. Mən son günlər iki dəfə Fransanın xarici işlər naziri J.-İ.Le Drianla danışmışam. Ona izah etməyə çalışmışam ki, biz insanların öldürülməməsinin, öyrəşdikləri yerlərdən qopmamasının, qaçqınların və köçkünlərin sayının böyük rəqəmlərə - on minlərə çatmamasının qeydinə qalırıq və buna görə narahatıq.

Söhbət sözün əsl mənasında dəqiqələrdən getdiyi bir şəraitdə (bu dəqiqələrdən hər biri insan həyatı kimi dəyərə sahib idi) Vaşinqtona, Parisə zəng edib, bu və ya digər formulu dəstəkləyib-dəstəkləməyəcəkləri barədə razılaşmag vaxt yox idi. Odur ki,  bu cür iradlar irəli sürmək yanlış və qeyri-etikdir”, - deyə o qeyd edib. -02D-