RF XİN rəhbəri Dağlıq Qarabağda vəziyyət barədə

Moskva/12.11.20/Turan: Moskva əmindir ki, bütün tərəflər Rusiya sülhməramlılarının Dağlıq Qarabağa gəlməsində maraqlıdır. Türkiyənin sülhməramlı missiyası münaqişə zonasına göndərilməyəcək. Türkiyəli müşahidəçilərin fəaliyyəti isə atəşkəsə nəzarət üzrə Rusiya-Türkiyə mərkəzi ilə məhdudlaşacaq. Bu barədə Rusiyanın xarici işlər naziri Sergey Lavrov cümə axşamı keçirilən brifinqdə bildirib.

Rusiya Qarabağla bağlı əldə edilmiş razılaşmaları pozmaq cəhdlərini görmür. Ermənistan müxalifəti razılaşmaların əldə edilməsi ilə bağlı situasiyalarda spekulyasiya etməyə çalışır. O, guya Rusiyanın dondurulmuş münaqişənin saxlanmasında maraqlı olması barədə qiymətləndirmələrin düzgün olmadığını deyib.

XİN rəhbəri hesab edir ki, Qarabağın statusu ilə bağlı məsələnin həllinin süni şəkildə müəyyən edilməsi yolverilməzdir. Onun sözlərinə görə, bu region əhalisinin bütün kateqoriyalarının hüquqları aydın olandan sonra status müəyyənləşdiriləcək.

Nazir bildirib ki, ABŞ və Fransa nümayəndələri, həmçinin Beynəlxalq Qızıl Xaç Komitəsinin rəhbəri tezliklə Qarabağda vəziyyəti müzakirə etmək üçün Moskvaya gələcəklər.

O həmçinin qeyd edib ki, RF Dağlıq Qarabağda mədəniyyət abidələrinin qorunub saxlanmasına və bərpasına YUNESKO-nu cəlb edəcək.

Lavrov onu da deyib ki, Rusiya, ABŞ və Fransanın daxil olduğu ATƏT-in Minsk Qrupunun həmsədr üçlüyünün tərkibinin genişləndirilməsi nəzərdə tutulmayıb.-02D-