Rusiya peyk əleyhinə silah hazırlayır - Ağ Ev

Cümə axşamı Bayden Administrasiyası təsdiq edib ki, Rusiya kosmosdakı hədəfləri vurmaq üçün sistemlər hazırlayır, xəbəri Turan-ın Vaşinqtondakı müxbiri verib.

Bir müddət əvvəl Konqresin kəşfiyyat komitəsi milli təhlükəsizlik üçün ciddi təhdid olduğu haqqında xəbərdarlıq edib.

"Bunun Rusiyanın hazırladığı peyk əleyhinə potensialla bağlı olduğunu təsdiq edə bilərəm". Bu barədə jurnalistlərə prezidentin müşaviri və Milli Təhlükəsizlik Şurasının nümayəndəsi Con Kirbi brifinqdə bildirib.

Öz növbəsində, prezidentin milli təhlükəsizlik üzrə müşaviri Ceyk Sallivan cümə axşamı Konqres liderlərinə təhlükə haqqında xəbərdarlıq edib. Sallivan təfərrüat verməyib, lakin qeyd edib ki, ABŞ milli təhlükəsizliyinin və Amerika xalqının müdafiəsi üçün tədbirlər görəcək.

Yüksək vəzifəli məmurların sözlərinə görə, Vaşinqton Rusiyanın belə bir potensial yaratmaq cəhdindən xəbərdar idi, son həftələrdə kəşfiyyat Rusiyanın nə etmək istədiyini əminliklə qiymətləndirməyə müvəffəq olub. Ağ Ev bu potensiala nüvə silahının və ya onun çatdırılması vasitələrinin daxil olub-olmadığını açıqlamayıb.

Rusiya 2021-ci ildə sovet dövrünə aid peyki yerdən buraxılan raketlə vurduğu zaman beynəlxalq qınaqla qarşılaşmışdı. Sınaqlar nəticəsində 1500 kosmik zibil parçası yaranmışdı, bu da Beynəlxalq Kosmik Stansiyanın ekipajı üçün təhlükəyə çevrilmişdi.