Sabiq səhiyyə naziri hakimiyyətin COVİD-19 pandemiyası ilə bağlı tədbirlərini tənqid edir

Bakı/21.12.20/Turan: Sabiq səhiyyə naziri Əli İnsanov COVİD-19 pandemiyasına qarşı qeyri-kafi mübarizə tədbirlərinə görə ölkə hakimiyyətini tənqid edib. O, “Azadlıq Radiosu”na müsahibəsində qeyd edib ki, pandemiya bir ilə yaxındır davam edir, amma hələ də müəyyən bir müalicə rejimi yoxdur.

“Alimləri dəvət edib bir müalicə rejimi müəyyən etməyiblər. Hərə ağlına gələn kimi edir. Dərman çatışmazlığı və bahalığı hiss olunur. Hətta morqlardan ölüləri pulsuz vermirlər”, deyə İnsanov bildirib. Bu zaman o qeyd edib ki, ÜST koronavirusdan ölən insanları yarmağı qadağan edib.

Xəstəxanalarda yer çatmır, evdə xidmət üçün isə tibb bacısı 500 manat alır.

Alman həkimlər müəyyən ediblər ki, koronavirus damarlarda tromb yaradır. Buna görə COVİD-19-un müalicəsində antibiotiklərdən, qan duruldan preparatlardan istifad etmək lazımdır.

“İmmuniteti qaldırmaq üçün dərmanlardan istifadə olunmalıdır. Virusa qarşı dərman olmalıdır. Damarları genişləndirmək üçün iynələrdən istifadə olunmalıdır. Yəni standart bir müalicə rejimi hazırlanmalıdır. Bu konkret bir xəstəlikdir, standart rejimi olmalıdır”, deyə o bildirib.

İnsanov vaksinasiyanın səmərəliliyinə şübhə ilə yanaşır. Onun fikrincə, vaksini hazırlamaq üçün xəstəliyin törədicisini uzun illər zəiflətmək lazımdır. Misal üçün, yüz il bundan əvvəl vərəmə qarşı vaksin hazırlamaq üçün 12 il vaxt lazım oldu.

İnsanovun fikrincə, kollektiv immunitet yaranması üçün bütün dünya əhalisi yoluxmalıdır.

“Yalnız bundan sonra bu infeksiya yoxolacaq”, İnsanov belə hesab edir. -05D06-