Sabirabadda Cəmil Həsənliyə dəstək mitinqi keçirilib (YENİLƏNİB)

 Demokratik Qüvvələrin Milli Şurasının (DQMŞ) prezidentliyə namizədi Cəmil Həsənli Sabirabad rayonunda seçicilər qarşısında çıxış edib. 

O, diqqəti korrupsiya problemlərinə yönəldib, 2010-cu il daşqınlarının nəticələrinin aradan qaldırılması üçün ayrılmış dövlət vəsaitinin mənimsənilməsinə toxunub. Həmin daşqınlardan Sabirabad sakinləri daha çox zərər çəkiblər.

C.Həsənlinin fikrincə, bu daşqın təbii fəlakət olmayıb, yerli sakinlərin sıxışdırılması və Kür sahillərindəki məhsuldar torpaqların zəbt edilməsi üçün məmur-oliqarx qrupları tərəfindən süni şəkildə törədilib. 

Sonra C.Həsənli hakimiyyətin antixalq siyasəti ucbatından bütün tərəflərin dərin böhran içində olduğunu deyib. O, kənd təsərrüfatının dərin tənəzzülü nəticəsində kəndlilərin yoxsul vəziyyətə düşməsinin üzərində dayanıb.  

AXCP lideri Əli Kərimli hakimiyyətin korrupsiyaya uğradığını və düzgün seçkilərdən qorxduğunu bildirib, çünki xalqın dəstəyinə arxalanmır. O,  Sabirabadda müxalifətin mitinqindən əvvəl təşkil edilmiş təxribatın səbəblərini bununla  izah edib. 

Öz növbəsində keçmiş deputat Pənah Hüseyn deyib ki, təxribatçıların Sabirabada heç bir aidiyyatı yoxdur və onlar başqa yerlərdən gətirilib.

P.Hüseynin sözlərinə görə, özbaşınalıqdan və qanunsuzluqdan çox əzyyət çəkən Sabirabad sakinləri ölkədə dəyişikliyə tərəfdardır və Cəmil Həsənlini dəstəkləyirlər.

Beş yüzədək aksiya iştirakçısı C.Həsənlini sevinclə yola salıb.—01C—

2013 Oktyab 04 (Cümə) 13:37:50

Cümə günü günorta Sabirabaddakı yerli stadionda müxalifətin prezidentliyə namizədi Cəmil Həsənli ilə seçicilərin görüşü başlayıb. Lakin polislərdən ibarət növbəti təxribat qrupu görüşü pozmaya cəhd göstərib. 

Turan-ın müxbirinin veridiyi məlumata görə, xeyli adam girişi bağlayaraq  İlham Əliyevi dəstəkləyən şüarlar səsləndirib. 

“Biz prezidentimizin əleyhinə çıxanları bura buraxmarıq.  Rədd olub getsinlər”, - çığıraraq  münaqişə yaratmaq istəyiblər. Lakin müxalifət tərəfdarları təxribatçıları sıxışdırıb və görüş başlayıb.

Təxribatçılar AXCP lideri Əli Kərimlinin və Cəmil Həsənlinin çıxışlarını pozmağa cəhd etsələr də bu, baş tutmayıb.

Digər şəhərlərdə olduğu kimi, burada da polis görüşün keçirildiyi yerə gedən yolları əhatəyə alıb və müxalifətçi namizədlə söhbət etmək istəyən vətəndaşları buraxmayıb.

Görünür, hakimiyyət yerlərdə C.Həsənlinin populyarlığından ciddi narahatdır -01В-