Şəkidə polis AXCP-nin tədbirini pozub

Bazar günü Şəkidə polis AXCP rəhbərliyinin yerli fəallarla görüşünə mane olub.

Turan-ın bölgə müxbirinin məlumatına görə, 60-a yaxın adamın iştirakı ilə görüş AXCP Şəki rayon təşkilatının rəhbəri Əli Abdullayevin evinin həyətində keçirilirmiş. Lakin görüş başlayan kimi polislər həyətə girərək toplaşanları dağıtmağa başlayıblar. 

Evin sahibi Əli Abdullayev, AXCP Rəyasət Heyətinin üzvü Sahib Kərimli və reportaj hazırlamaq üçün baş verənləri çəkən Turan-ın müxbiri Məmmədsadıq Fətəliyev saxlanılaraq polis şöbəsinə aparılıblar.

Jurnalist xidməti vəsiqəsini təqdim etməsinə baxmayaraq, saxlanılıb. Üç saatdan sonra onları buraxıblar.

Sonradan polis rəhbərliyi “anlaşılmazlığa görə” Turan-ın müxbirindən üzr istəyib.  

AXCP fəalına bildirilib ki, polisin müdaxiləsi qarşıdurmaya yol verməmək üçün edilib, belə ki, bir qrup yerli sakin müxalifətçilərin gəlişinə etirazını bildirib.

Lakin AXCP-nin məlumatına görə, öyrədilmiş adamlar hakimiyyət tərəfindən  Ə.Abdullayevin evinə göndərilib. 

Bundan əvvəl polis Sabirabad və Qəbələ rayonunun Nic kəndində AXCP rəhbərliyinin iştirakı ilə keçirilən müşavirələri pozub.06D--