Sergey Lavrov: «Mən məsələni Ermənistanın, Azərbaycanın, qarabağlıların yerinə həll edə bilmərəm» (YENİLƏNİB)

Yerevanda səfərdə olan RF XİN rəhbəri Sergey Lavrov Ermənistan prezidenti Serj Sarkisyanla görüşüb. Görüş zamanı Qarabağ nizamlanması ətrafında vəziyyət müzakirə olunub.

Sarkisyan Azərbaycanı məsuliyyətsizlikdə və müharibəyə təhrikdə ittiham edib. O bildirib ki, Qarabağın Azərbaycanla heç bir əlaqəsi ola bilməz. O, Minsk Qrupunu vəziyyətin gərginləşməsində günahkar olanı açıqlamamaqda ittiham edib.

Bu çıxışdan sonra Lavrov qeyd edib ki, hazırki mərhələdə sakitləşmək və inam mexanizmlərini həyata keçirmək lazımdır.

“Niyə vəziyyət belə kritik nöqtəyə çatdı? Mən məsələni Ermənistanın, Azərbaycanın, qarabağlıların yerinə həll edə bilmərəm. Ancaq düşünürəm ki, əgər bir balaca irəlilyiş edə bilsək, ümumi prinsipləri müəyyən edə bilsək, bu, təkcə danışıqların başlaması üçün mühüm rol olmazdı, həm də zorakılıq hallarının alovlanmasına yol verməmək üçün amil olacaq.

Biz çalışmışıq, çalışırıq və çalışacağıq ki, amerikalı, fransalı həmsədrlərlə birlikdə yardım edək.  Bizim mövqeyimiz eynidir. Anladığım qədər Ermənistan bunu dəstəkləyir, həmsədrlər üçlüyü ATƏT ilə birlikdə əsas koordinator funksiyasını yerinə yetirməyə davam etməlidir.

Biz hansısa paralel kanallar axtarmaq,  tərəflərin etimadını qazanmayan mexanizmlər yaratmaq cəhdlərini dəstəkləmirik”, - S.Lavrov vurğulayıb.–0--

2016 Aprel 22 (Cümə) 13:48:59

  Moskva Dağlıq Qarabağda müddətsiz atəşkəs haqqında sazişə ciddi əməl olunmasına tərəfdardır. Bu barədə cümə günü RF XİN rəhbəri Sergey Lavrov Yerevanda Ermənistan XİN rəhbəri Edvard Nalbandyanla  birgə keçirdiyi mətbuat konfransında bildirib.

“Atəşkəs rejimi haqda razılaşmalara ciddi əməl olunması, 1994-cü il və 1995-ci il sazişləri ilə bağlı yeni pozuntulara yol verilməməsi çox vacibdir. Bu sazişlərdə müddətsiz atəşkəs rejimi əksini tapıb və möhkəmləndirilib”, - Lavrov bildirib.

Onun sözlərinə görə, inam tədbirləri, gərginliyin aradan qaldırılması, snayperlər barədə ATƏT-in xəttilə razılaşmanı sonadək aparmaq lazımdır.

“Siyasi tənzimlənməyə gəlincə, biz mümkün olan hər şeyi etməyə hazırıq”, - o vurğulayıb və qeyd edib ki, zorakılığa və insidentlərə yol verməmək üçün mümkün olan hər şeyi etmək lazımdır”.

Öz növbəsində E.Nalbandyan deyib ki, Dağlıq Qarabağ ətrafında son hadisələr danışıqlar prosesini geriyə atdı. “Təhlükəsizliyə və sabitliyə ciddi zərbə vuruldu. Bunun nəticələrini necə aradan qaldırmaq barədə düşünmək lazımdır. Bu hadisələrlə danışıqlar prosesi geriyə atıldı”, - o qeyd edib.

Lavrov “Moskva nizamlanma ilə bağlı konkret hansı addımları atır?” sualının cavabından yayınaraq atəşkəsə əməl olunmasının, zorakılığa yol verməməyin  vacibliyini qeyd edib. “Çünki bu münaqişənin hərbi yolla həlli yoxdur”.

O həmçinin Türkiyəni təhrikçilikdə ittiham edib və bildirib ki, Türkiyə rəhbərliyinin bəyanatı mahiyyətcə sülhə yox, müharibəyə çağırış idi və “bu, yolverilməzdir”.

Lavrov nizamlanma ilə bağlı 2011-ci ildə təklif edilmiş Kazan variantını qəbul etməyən Bakının hərəkətlərini qiymətləndirməyib. “O hadisələrin iştirakçısı kimi deyə bilərəm ki, bu nizamlanma variantını rədd edən Ermənistan olmadı”, - Lavrov vurğulayıb.

Bu gün Lavrov Ermənistan prezidenti ilə görüşəcək. Çox güman ki, əsas söhbət bu görüşdə olacaq. Hələlik Lavrov Yerevana gətirdiyi ideyaların konturlarını açıqlamayıb.-02D-