Sərhəd Xidməti sərhədlərdə məhdudiyyət haqqında məlumatı təkzib edir

Bakı/28.02.20/Turan: Azərbaycan sərhədindən şəxslərin və nəqliyyat vasitələrinin keçidində məhdudiyyətlər haqqında KİV-də yayılan məlumatlar həqiqətə uyğun deyil, bu barədə Dövlət Sərhəd Xidmətinin fevralın 28-də yaydığı məlumatda deyilir.

Mənbənin məlumatına görə, həmsərhəd ölkələrlə dövlət sərhədindən vətəndaşların, sərnişin avtobuslarının, fərdi və yük nəqliyyat vasitələrinin buraxılmasında hər hansı məhdudiyyətlər tətbiq edilməyib.

Eyni zamanda, dövlət sərhədindən buraxılış məntəqələri gücləndirilmiş iş rejimində fəaliyyətlərini davam etdirirlər. Koronavirusdan profilaktika üçün zəruri tədbirlər görülüb.

Qeyd edək ki, bir müddət əvvəl Gürcüstanın səhiyyə naziri Azərbaycanla sərhədin iki həftəlik bağlandığını bildirmişdi. Bu, Azərbaycandan tranzitlə İrandan gələn Gürcüstan vətəndaşında koronavirus aşkar edildikdən sonra baş verib.

İran KİV-ləri də qonşu ölkələrlə sərhədlərini bağladığını bildirib və ölkəyə yalnız İran vətəndaşlarını buraxır.

Eyni zamanda, İrandan qonşu ölkələrin vətəndaşları buraxılır.

Türkiyənin Naxçıvanla sərhədi bir neçə günlük bağlanmışdı, sərhəd fevralın 26-da açılıb. -16D-