Səudiyyə Ərəbistanı hakimiyyəti korrupsiyada ittiham olunanlardan 800 mlrd. dollarlıq aktivləri müsadirə edəcək

Bakı/08.11.17/Turan: Səudiyyə Ərəbistanı hakimiyyəti korrupsiyaya qarşı mübarizə kampaniyası çərçivəsində ümumi məbləği 800 mlrd. dollara qədər olan aktiv və vəsaitləri müsadirə etməyə hazırlaşır, xəbəri The Wall Street Journal yayıb.

Qəzetin məlumatına görə, ötən həftə sonu 60-dan çox insan, o cümlədən şahzadələr, məmurlar və digər nüfuzlu Səudiyyəlilər saxlanılıb. Saxlanılan şəxslər çirkli pulların yuyulmasında, hakimiyyətdən sui-istifadədə, rüşvətxorluqda, dövlət vəsaitlərini israf etməkdə və məmurlardan pul tələb etməkdə ittiham olunurlar. Səudiyyə Ərəbistanının Mərkəzi Bankı korrupsiya qalmaqalı fiqurantlarının bank hesablarını dondurub.

Mənbə iddia edir ki, korrupsionerlərdən müsadirə edilən aktivlər dövlətin mülkiyyətinə keçəcək. Onun sözlərinə görə, Səudiyyə hakimiyyəti bu yolla 3 trln. Riala (təxminən 800 mlrd. dollara qədər) vəsait əldə etmək niyyətindədir. "Onlar hesab edirlər ki, bu insanlardan 2-3 trln. rial ala biləcəklər", deyə nəşrin həmsöhbəti qeyd edib.

WSJ-nin məlumatına görə, bu vəsaitin böyük hissəsi xaricdədir, bu da onları qaytarmaq cəhdlərini çətinləşdirəcək. Amma bu məbləğin bir hissəsi belə Səudiyyə Ərəbistanının maliyyə vəziyyətini düzəldə biləcək, deyə məqalədə bildirilir. Qəzet qeyd edir ki, "neft qiymətlərinin aşağı olduğu uzun dövr hökuməti beynəlxalq qiymətli kağızlar bazarından vəsait almağa, habelə qızıl-valyuta ehtiyatlarından istifadə etməyə məcbur edib.

Xatırladaq ki, noyabrın 5-nə keçən gecə vəliəhd şahzadə Məhəmməd ben Salman ben Abdel Əziz Əl Səudun rəhbərlik etdiyi Korrupsiyaya qarşı Mübarizə üzrə Ali Komitə 11 şahzadənin və 30-a yaxın keçmiş və hazırki nazirin və sahibkarın korrupsiya ittihamı ilə saxlanılması haqqında qərar verib.

Yeni orqan korrupsiyaya qarşı genişmiqyaslı mübarizə kampaniyası elan edən Səudiyyə monarxı Salman ben Abdel Aziz Əl Səudun fərmanı ilə formalaşdırılıb. -02D-