Siyasi gənc fəalların həbsləri və onlara qarşı işəgənclər pislənildi

“Siyasi Məhbuslarsız Azərbaycan” İctimai Birliyi cümə axşamı RATİ-də “Ölkənin gələcəyi olan gənclərin həyatı təhlükədədir” adlı “dəyirmi masa” keçirib.

Birliyin rəhbəri, keçmiş siyasi məhbus Elşən Həsənli ölkədə öncə dindarlara, daha sonra jurnalistlərə, hazırda isə fəal siyasi gənclərə qarşı repesssiyaların getdiyini bildirib. Bu gənclərin “günahı”nın isə ancaq ölkədə demokarik dəyişikliklər istəmələri olduğu qeyd edilib. Qısa zamanda xeyli fəal siyasi gəncin həbsə alınması nəzərə çatdırılıb. Hazırda həbsdə olan siyasi gənclərin talelərindən, onlara qarşı münasibətdən narahatlıq ifadə edilib. Gənclərin həbsi hakimiyyətin ölkədə gənclər hərəkatının güclənməsindən qorxusunun nəticəsi kimi dəyərləndirilib. Eyni zamanda həbsdə olan gənclərə verilən işgəncələr onları fəal siyasi fəaliyyətdən çəkindirmək üçün edildiyi vurğulanıb. 

Siyasi məhbus, Müsavat Partiyası gənclərinin lideri Tural Abbaslının və “NİDA” Hərəkatının fəallarından Zaur Qurbanlının valideynləri övladlrının həbslərinin qanunsuz olduğunu deyiblər. T.Abbaslı 15 sutka inzibati cəza alaraq saxlandığı Binəqədi təcridxanasında qollarının qandallanması kimi işgəncələrə məruz qalır. Talassemiya, astma xəstəsi olan Z.Qurbanlı ev dustaqlığına buraxılmır, müstəntiq həkim müayinəsinə iczaə vermir. 

Hüquq müdafiəçisi Novella Cəfəroğlu gənclərə qarşı hər iki münasibəti işgəncə faktı kimi dəyərləndirib. Bu haqda ölkənin aidiyyatı qurumlarına məlumat verildiyi qeyilib. Bununla bağlı dövlət başçısına, beynəlxalq qurumlara, xarici ölkələrin səfirliklərinə müraciət olunması, məsələni Avropa məhkəməsinə daşımaq təklif edilib. Müraciətlərdə gənclərin həbslərinin əsassızlığı, ölkədə siyasi əqidəyə görə ayrı-seçkiliyin olması, həbsdəki siyasi fəallara işgəncələrin önə çəkilməsi xüsusi qeyd edilib. 

Daha bir məsələ kimi ölkə qanunlarının işləməsilə bağlı monitorinqin keçirilməsi səsləndirilib. Həbsxana və təcridxanalarda çox zaman qanunların deyil, belə müəssisə başçılarının daxili əmrlərinin qanun səviyyəsinə qaldırıldığı nəzərə çatdırılıb. Bu tipli əmr və sərəncamların isə demək olar ki, əksər halda humanizm prinsiplərindən uzaq olması vurğulanıb.

Tədbirin yekunu olaraq qəbul edilən bəyanatda siyasi baxımdan fəal gənclərin əsassız həbsləri, onlara qarşı  işgəncələr pislənilib, rəmsi Bakıdan belə həbslərə son qoyması tələb edilib.-05C-