Sorğunun yekunlarına əsasən Azərbaycan vətəndaşları beynəlxalq institutlar arasında ən çox Aİ-yə inanırlar

Bakı/12.07.19/Turan: Azərbaycan vətəndaşları arasında keçirilmiş sorğunun nəticələrindən məlum olub ki, respondenlərin 46%-i Avropa İttifaqına müsbət münasibət bəsləyir. Bu barədə Aİ Azərbaycan nümayəndəliyinin rəhbəri Kəstutis Yankauskas sorğunun yekunlarının təqdimatında bildirib.

İllik sorğu "Şərq tərəfdaşlığı" proqramı ölkələrində (Azərbaycan, Ermənistan, Gürcüstan, Ukrayna, Moldova, Belarus) keçirilib. Ümumilikdə, 6000 nəfərin rəyi soruşulub, hər ölkə üzrə 1000 nəfərin.

Müqayisə üçün qeyd edək ki, 2016-cı ildə rəyi soruşulanların 27%-i, 2017-ci ildə 47%, 2018-ci ildə 39%-i Aİ-yə münasibətin müsbət olduğunu bildirmişdi.

Azərbaycan vətəndaşları beynəlxalq institutlara inamla bağlı sual üzrə birinci yerə Aİ-ni qoyublar.

Belə ki, respondentlərin 35%-i deyib ki, daha çox Aİ-yə etibar edir. 25% BMT-ni və Avrasiya İqtisadi Birliyini, 20% NATO-nu dəstəkləyib.

Aİ dəyərlərinə gəlincə, üç əsas dəyər kimi iqtisadi rifah (78%), qanunun aliliyi (78), insan hüquqları (77%) göstərilib.

Aİ-nin az qeyd olunan dəyərləri arasında demokratiya (70%), din azadlığı (68%), korrupsiyanın olmaması (57%) olub.

Şəxsi dəyərlər planında azərbaycanlı respondentlər ən çox dinc şəraiti, təhlükəsizlik və sabitliyi (52%), düzgünlük və şəffaflıq (45%), söz azadlığını (26%) qeyd ediblər. Bu kateqoriyada ən az şəxsi azadlıq (10%), başqa mədəniyyətlərə, etnik azlıqlara hörmət (2%), media azadlığı (2%) qeyd olunub.

Aİ haqqında ən aktual mövzular üzrə sorğuya görə, birinci yerdə Aİ-də həyat tərzi gəlir (39%). Sosial və siyasi xəbərlər axtaranlar 35%, iqtisadi xəbərlər 33%, təhsil və mədəniyyət proqramları 32%-dir Aİ haqqında ümumi informasiya 12%, Aİ tərəfindən yaradılan imkanlar 7%, Aİ və "Şərq tərəfdaşlığı" ölkələri arasında əlaqələr 5% olub. -71D-