S.Rüstəmxanlı: Azərbaycan İrandakı rejimin süqutundan sonrakı hadisələrə hazırlaşmalıdır

Dünya Azərbaycanlıları Konqresinin həmsədri, deputat Sabir Rüstəmxanlı ABŞ- a səfərinin nəticələrinə dair cümə günü RATİ-də mətbuat konfransı keçirib.  

Səfərin aprelin 23-dən mayın 2-nə kimi davam etdiyini deyən DAK həmsədri səfəri Azərbaycan və Güney Azərbaycan məsələsi baxımından “olduqca faydalı” kimi dəyərləndirib. “Biz bu səfərdə ABŞ-ın Güney Azərbaycan məsələsinə diqqəti kifayət qədər artırdığının şahidi olduq”, - deyə S.Rüstəmxanlı səfərə qiymət verib.

İstər ABŞ Dövlət Departamentində, istərsə də ABŞ Konqresindəki görüşlərdə Qarabağ və Güney Azərbaycan məsələsi xüsusilə diqqət mərkəzində olub. ABŞ tərəfdən İrana Azərbaycan dilində tele-readio yayımın həcminin dəfələrlə artırılması təklifi edilib. Konqresmen D.Roraxaberlə bu haqda geniş fikir mübadiləsi aparıldığı bildirilib. “Mən danışığın bütün detallarını açmaq niyyətində deyiləm, amma nəticə, yəqin ki, yaxın zamanlarda məlum olar”, - deyə o qeyd edib.

DAK həmsədri bu görüşlərdə Qərbin “Orta Şərq layihəsi”ndə Azərbaycanın yerinin necə olacağı haqda baxışların xüsusi mahiyyət daşıdığını söyləyib. Bu layihədə Azərbaycanın bir hissəsinin “xəyali Kürdüstan dövləti”nə verilməsinin nəzərdə tutulmasının izah olunmaması ABŞ-ın diqqətinə çatdırılıb. “Orta Şərq layihəsi”nin tam detallarını açmadan, S.Rüstəmxanlı İrandakı rejimin siyasi səhnədən silinəcəyi bəyanatı verib. Güney və Quzey Azərbaycanı, rəsmi Bakını bundan sonrakı hadisələrə hazır olmağa səsləyib. S.Rüstəmxanlı səfər çərçivəsində ABŞ-da Azərbaycan və türk ictimai birliklərinin tədbirlərinə də qatıldığını söyləyib. 

DAK həmsədri S.Rüstəmxanlı Güney Azərbaycan Milli Oyanış Hərəkatının rəhbəri, DAK Məşvərət Məclisinini sədri, ABŞ-da mühacirətdə olan Mahmudəli Çöhrəqanlının Türkiyə və Azərbaycana buraxılmamasını pisləyib. Onun Bakıya buraxılması ilə bağlı rəsmi Bakıya etdiyi müraciətlərin cavabsız qalmasını S.Rüstəmxanlı haqsızlıq kimi dəyərləndirib.   

S.Rüstəmxanlı Azərbaycan ədəbiyyatşünası Xalidə Xalidin bu günlərdə İranda həbsə alınmasını da pisləyib. Bu həbsi rəsmi Tehranın Azərbaycana qarşı təxribatı kimi dəyərləndirib. -05C-