Azərbaycan hakimiyyəti azad mətbuatın inkişafında maraqlı deyil

Azərbaycanda ifadə azadlığı sahəsində vəziyyət pisləşməkdə davam edir. 2013-cü ilin əvvəllərindən etibarən jurnalistlərə qarşı onlarla fiziki hücum faktı qeydə alınıb, yeddi KİV nümayəndəsi həbsdədir, müxalif nəşrlər böyük cərimələrə məruz qalır, hakimiyyət on-line məkan üzərində nəzarət qurmağa çalışır. Bu fikri Reportyorların Azadlıq və Təhlükəsizlik İnstitutunun (RATİ) direktoru Emin Hüseynov bu gün hüquq müdafiə sahəsində fəaliyyət göstərən bu QHT-nin Azərbaycanda 2012-ci ildə və 2013-cü ilin birinci rübündə ifadə azadlığı sahəsində vəziyyət haqqıdna hesabatlarının təqdimatında bildirib. 

Təqdimat Ümumdünya mətbuat azadlığı gününə həsr edilmişdi.

Hüseynov təəssüflə hakimiyyətin vətəndaş cəmiyyəti ilə ifadə azadlığı məsələləri ilə bağlı dialoqa hazır olmadığını qeyd edib.

Buna misal kimi o, hakimiyyətin RATİ və ATƏT-in Bakı ofisi tərəfindən mayın 2-də təşkil edilmiş konfransda iştirakdan imtina etməsini və alternativ tədbir keçirməsini göstərib. Bu tədbirdə ifadə azadlığı sahəsində problemlərə məhəl qoyulmayıb və vəziyyətin yaxşı olduğu iddia olunub.

Bu arada, Hüseynov qeyd edib ki, vəziyyət ağır olaraq qalmaqdadır. 

2005-ci ilin martında qətlə yetirilmiş jurnalist Elmar Hüseynovun və 2013-cü ilin noyabrında qətlə yetirilmiş publisist Rafiq Tağının cinayəti hələ də açılmayıb.

Hakimiyyətin siyasi sifarişi ilə həbs edilmiş 7 jurnalist həbsdə qalmaqda davam edir.

Eyni zamanda, Hüseynov regional “Xəyal TV” televiziyasının 1 mart 2012-ci il Quba hadisələri ilə bağlı həbs edilmiş iki jurnalistinin bir il sonra sərbəst buraxılmasını müsbət qiymətləndirib.

Lakin jurnalistlər şərti azadlığa buraxılıb və bu onların ifadə azadlığına mənfi təsir göstərəcək, Hüseynov belə hesab edir.

Hesabatlarda bir qrup məsələlər – jurnalistlərə qarşı fiziki təzyiq, onların cinayət təqibi, on-line mediada problemlər, məhkəmə cərimələri və s. üzrə vəziyyət qiymətləndirilib.

Bundan başqa, “mətbuat düşmənləri” siyahısı tərtib edilib. Siyahıya prezident İlham Əliyevin, FHN rəhbəri Kəmaləddin Heydərovun, müdafiə naziri Səfər Əbiyevin və başqalarının adları daxil edilib.

Dövlət başçısı real azad KİV-lərin inkişafı üzrə addımlar atmır, eyni zamanda KİV haqqında qanunvericiliyə mürtəce düzəlişlərin təşəbbüskarı olur və ya onları dəstəkləyir.

RATİ vəziyyətin tənqidi ilə yanaşı, vəziyyətin yaxşılaşdırılması üzrə bir sıra tövsiyələr irəli sürüb. Tövsiyələrə həbs edilmiş jurnalistlərin azad edilməsi, jurnalistlərə qarşı cinayətlərdə təqsiri olanların cəzalandırılması, diffamasiyaya görə cinayət məsuliyyətinin ləğv edilməsi və s. yer alıb.

Tədbir başa çatdıqdan sonra jurnalist ictimaiyyətinin və hüquq müdafiəçilərinin bir qrup nümayəndəsi 2 mart 2005-ci ildə qətlə yetirilmiş “Monitor” jurnalının baş redaktoru Elmar Hüseynovun qəbrini ziyarət ediblər.

Elmar Hüseynovun qəbri başında sənhələşdirilmiş mitinqdə çıxış edən Turan agentliyinin direktoru Mehman Əliyev qeyd edib ki, jurnalistlərin qətlinə və onlara qarşı digər cinayətlərə görə cəzasızlıq azad mətbuata qarşı yeni hücumlara təşviq edir.

O, hakimiyyətin vətəndaş cəmiyyəti və media ilə dialoq qurmaq istəməməsinə və azad mətbuatın inkişafında maraqlı olmamasına diqqət çəkib.

Əliyev mediaya qarşı təzyiqə son qoymağa və həbs edilmiş 7 jurnalisti azad etməyə çağırıb. -16С06-